Shillong, Nohprah 22 : Ka Khasi Hills Autonomous District Council (KHADC) hynne ka sngi Thohdieng, kala mynjur ïa ka KHAD (Khasi Socïal Custom of Lineage (Amendment) Bill, 2023, kaba buh kyndon ba ki Dorbar Kur lane ki Seng Kur kin hap register ïalade bad ka Council bad ruh ban pynrung lang noh ïa ka ‘Ring Bïa lane Shaw Bhoi”.
Haba wanrah ïa ka Amendment Motion ha ka sngi kut jong ka Dorbar Tlang, u Nongïalam ka Lïang Pyrshah Bah Titosstarwell Chyne ula ong ba kane ka Amendment Bill ka khlem kren eiei halor ka kam ba kumno ka Council kan leh lada don ar kynhun ha ki Dorbar Kur kiba dei na kajuh ka kut ka jait.
“Nga don ïa ki jingtip ba ki don katto katne ki kur ki jait kiba don arkynhun. Ym tang katta, ka rukom pynïaid kur jong ngi ka long kaba pher bha namar ki don katto katne ki kur/jait kiba jied ïa ki Rangbah Kur kiba dei na ka kur/jait jong ki” ong u Bah Titos.
Une u CEM barim ula ai jingmut ruh ba kan bha eh lada lah ban pyndonkam noh da ka kyntien “Recorder’ ha ka jaka jong ka Registration ha kane ka Amendment.
Ha kajuh ka por, une u Nongïalam ka Lïang Pyrshah ula ong b aula ïakren bad ki katto katne ki Seng Kur bad kine kila pynpaw ïa ka jingbym sngew ïahap namar ba ki hap ban register ïalade kum ki kynhun seng.
Haba ban jur ïa ka jingdonkam ban don ka kynhun ka ban kren halor ka jingïashongkha khleh, u Bah Titos ula ong “Ngi dei ka Jaidbynriew bar it paid bad ngi donkam ïa ka kyrdon namar ka don ka jingma kaba khra lada ki briew ba nabar ki wan shongkha ïa ki Thei Khasi. Ka jingsngewkhïa jong nga ka long ba kumno ban ïada ïala ka jong ka snap kyrpang haba ngi la ioh ba kumno ka khaii ka pateng kala shah knieh noh ha kiwei bad ngi lah nang duh ïa ka khyndew ka shyïap”.
Haba jubab, u Dy CEM Bah PN Syiem ula pynksan ïa ka Bill da kaba ong ba ka kyntien Registration ka kham bha namar ka dei ka Act bad ka kyntien Record ka kham tlot haba nujor bad ka Registrar.
U Bah PN Syiem ula pyntip ba ka Council kala dep thaw ïa ka Tribunal ka ban shim ïa ka jingkitkhlieh ha kaban khmih ïa ka kam lada don ka jingïapait ïapra hapdeng kajuh ka kur ka jait.
