Ka Balang Katholik ka ithuh tang ïa ka shongkha hapdeng u shynrang bad ka kynthei : Rev. Fr. Richard

By Mawphor News Desk On Dec 23, 2023

Shillong, Nohprah, 22: Ka Balang Catholic lyngba ka The Dicastery for the Doctrine of Faith ka la pynmih ïa ka dulir “Fiducia Supplicans” ha ka 18 tarik Nohprah 2023 ha kaba ka la pynshai ba ki Nongsharai Balang bad ki Lyngdoh Sohblei kim lah ban ai ïa ka Sacrament Jjingkyntiew Kurim ïa kiba shongkha na kajuh ka long kynthei shynrang hynrei ki lah tang ban ban ai ïa ka jingduwai kyrkhu kyrdoh.
U Mawphor u la ïoh ban ïakren bad u Vicar Genaral jong ka Jylla Niam Bah Shillong u Rev. Father Richard M. Majaw ha kaba ïadei bad kane ka bynta.
U Rev.Fr. Richard u la ïathuh ba ïa kane ka Dulir ka Balang Catholic kam shym la wanrah ïa kano kano ka jingpynkylla ïa ka jinghikai tynrai ha ka shongkha shongman bad ïa ki aiñ ka Balang ba ka shongkha shongman kan dei beit hapdeng u shynrang bad ka kynthei bad ka ong ruh ba kito kiba shongkha na kajuh ka long kynthei shynrang ki lah ban shu ïoh tang ïa ka jingduwai kyrkhu kaba ki Lyngdoh ki ai ïa kito kiba pan jingkyrkhu na ki kti u Lyngdoh Sohblei.
U la ong ruh ba kane ka Dulir kam pynshlur satia ïa ka shongkha na kajuh ka long kynthei shynrang bad u ong ba kane ka Dulir ka thew ïa ka jingmut jong ka jingduwai kyrkhu.
“Kane ka dei ka jingduwai kaba u Lyngdoh u lah ban duwai hi khlem da shim ïa ka jingduwai jong ka Balang. Ïa kane ka jingduwai kyrkhu ym dei ban sngewthuh bakla ba ka dei ka jinglehñiam jong ka Sakrament Jingkyntiew Kurim jong ka Balang Katholik,” la pynshai u Vicar General.
Ha kaba ïadei bad kane, u Archbishop jong ka Jylla Niam Bah Shillong u Most Rev. Victor Lyngdoh u la phah da ka pynbna sha baroh ki paidriewngeit jong ka Balang Catholic hapoh ka Jylla Niam Bah Shillong ban pynshai ba ka Dulir “Fiducia Supplicans” ka khlem pynkylla ïa ka aiñ tynrai jong ka Sacrament Jingkyntiew Kurim ha ka Balang Catholic bad ka jingduwai jong u Lyngdoh kam mut ba u mynjur ne pynshur ïa ka jingleh jong ki (briew kiba ïashongkha para shynrang bad para kynthei).
“To ngin ïai bat barabor ïa ka jinglong bakyntang jong ka Sacrament Jingkyntiew Kurim,” la kyntu u Nongsharai Mynsiem jong ka Jylla Niam Bah Shillong.