Kular u Bah Prestone Tynsong ban pynïoh surok rong ha ki shnong Karbi bad ka surok NUS

Nongpoh, K’Lyngkot 27: Ka jingïakynduh lang ba shisien shisnem jong ki paid Karbi na kylleng ki jaka jong ka jylla Meghalaya haka 49th AMKA Annual Conference kaba la long haka shnong Umrang Umjaren, Ri-Bhoi kala long kaba shongkun ha kaba ki paid Karbi na kylleng ki jaka kila wan ban shim bynta ha katei ka lympung.
Kum ban shu pynpaw ba ka Annual Conference jong ka All Meghalaya Karbi Association (AMKA) ka dei ka jingïalang kaba heh duh jong ki paidbah Karbi haka jylla kaba ju pynlong ruh man la u snem kumba 2 sngi naduh bala seng ïaka AMKA ha u snem 1975, bad ka jingthmu jong katei ka jingïakynduh lang jong ki paid Karbi ka long ban wanrah ka jingïatylli, ka jingïaïeid bad ka jingithuh ithaw hapdeng ki jaitbynriew Karbi kiba shong ba sah haka jylla Meghalaya bad kumjuh ruh ban pynpaw ki jingtreikam jong ka seng baroh shisnem.
Ïa katei ka jingkynduh lang jong ki paid Karbi la wan ban pynhap pyrda noh da u Bah Prestone Tynsong Symbud Myntri Rangbah ka jylla kum u kongsan haka jingdonlang u Bah Mayral Born Syiem MLA ka Nongpoh, Bah Balajied Ranee MDC Nongpoh, Bah MB Tongper, ADC Ri-Bhoi, Bah BB Makdoh President ka Synjuk ki Rangbah Shnong Ri-Bhoi, R.R Ronghang President AMKA lem bad kiwei kiwei.
Ha kane ka jingïalang naka liang ki Nongïalam jong ka AMKA ki la ïoh ruh ban ai ïaka dorkhas ha ka kti jong u bah Prestone kaba la pynpaw ïaka jingkwah ban ïoh noh ïaki 8 tylli ki surok rong kiba donkam ha ki bynta jong ka shnong Karbi ha kylleng jong ka jylla.
Haba kren ha katei ka sngi naka liang u Bah Prestone Tynsong u la pynpaw ka jingsngewkmen kaba khraw ban iohi ba katei ka jingïakynduh lang jong ki paid Karbi ka long kaba shongkun da ka jingwan shimbynta shitrhem jong ki paid Karbi na kylleng ki jaka jong ka Jylla Meghalaya bad kumjuh na Assam bad kane ka pyni shai ba jaitbynriew Karbi ka long ka jaitbynriew kaba don ka jingïa ieid ka jingtylli bad don ka jingangnud ban dang kyntiew shaphrang.
U la kyntu ruh ïaki paid Karbi ba kin pynneh ïaka jingïatylli ban wanrah ka jingsuk jingkmen khamtam sha ki thaiñ khappud jong ka jylla bad ban kyntiew iwei ïa iwei kumba ka jaitbynriew Karbi ka dei ka jaitbynriew kaba riewspah ka riti dustur bad kiwei kiwei.
Ha kaba ïadei bad ka dorkhas kaba ki paidbah Karbi kila aiti ha katei ka sngi ban siang rong ïa kumba 8 tylli ki surok ba donkam haki shnong ba shong ba sah da ki Karbi naka liang u Bah Prestone Tynsong u la kular ban pynioh katkum ka dorkhas kaba kila buh watla kam dei shisien leh bad pynkynmaw ruh ha katei ka sngi ba ka sorkar shen kan sa mang pisa lyngba ka World Bank ban siang rong noh ïa u surok Nongpoh-Umden-Sonapur ban pynsuk ïaka leit ka wan ki paidbah namar ka long kaba donkam ban don ka jingpynïasoh na kawei ka jaka sha kawei pat lyngba ki surok, u la bynrap.