“Ka juk mobile phone ka pynjngai ïa ka jingïadei, jingïajan bad ïa long kawei : Dr Ampareen

Shillong Kyllalyngkot 27: Ka Myntri ka Koit ka Khiah ka jylla ka Dr Ampareen Lyngdoh ka la ong, ba ka pateng mynta bad kaba mynshwa ka la ïapher bha khamtam haba kane ka juk kaba mynta bun ki la lapmiet ïa ka mobile phone bad kam don shuh ka jingïadei, ka jingiajan, jingialong kawei ne ka jingithuh ithaw hapoh ka shnong poh thaw.
Ka Dr Ampareen ka la kren ïa kane kum ka Kongsan ha ka jingpynhap pyrda ïa ka jingrakhe ïa ka jingdap 25 snem jongka Seng Samla Mawkhar kaba la long myntaka sngi Saitjaiñ.
“Ki samla ki don ïa ka jingbahkhlieh kaba khraw bha ban ïa kiba la heh bad rangbah bad ki samla ki donkam mynta ban peit ba kan don ka jingïakynduh para samla ban ïarap ïa kito kiba don ha ki jingeh bad ban ïasaid lem na ka bynta ka jingdawa bad jingdonkam jong ki para samla” ong ka kong Ampareen.
“Kaba kham kongsan tam ka long ban hikai ia ki pateng la pateng ban im shabar jong ka jingim marwei da kaba lapmiet tang iaka mobile ne ka ‘Mobile Culture’… kane kadei kaei kaei kaba ktah bha bad kan sa poi ka por ha kane ka nongbah ka jong ngi ba ngin ym ithuh ruh watla ngi shong marjan iwei ia iwei” kala bynrap.
Kala ong, ba ki khynnah mynshwa ki ialehkai ia ki jingialehkai kiba bunjait bad ki iathuh ithaw iwei iwei lyngba ka jingialehkai lang hynrei ha kane ka juk kam don shuh ka jingiajan bad ki khun samla mynta kila duh ia kine kiei kiei baroh kiba ki khynnah mynshwa ki ju ialehkai.
“Bunsien ki kmie ki kpa ruh ki bun kam ha la ki jong ki mobile bad kim don por ban iakhana bad ki khun bad kane kala pyniajngai na ki khun na ka jingpeit jingkhmih ka jongki… nga ai khublei ia ka Seng Samla Mawkhar kaba la pynlong ia ki prokram kaba tan lut ia ki samla ki samhoi sha kine ki rynsan ban iakynduh bad ban pynlong ia ki jingiakob bapher bapher bad ban pynshongshit pynsawa iaka shnong ka thaw” ong ka Dr Ampareen.
Ka la ong ba ki don ka por ba la ïohi ba ki Seng Samla ki pynlong ïa ki tamasa shwa ka elekshon ne ki prokram bapher bapher hynrei kala kyntu ïa ki Seng Samla ba ki dei ban pynlong man la ka por ïa ki prokram.
Ha kane ka sngi la ïadonlang u MLA ka North Shillong u Bah Adelbert Nongrum, u MDC ka Mawkhar Pynthorumkhrah u Bah PN Syiem, u Rangbah Shnong ka Mawkhar u Bah Arwan Tariang, ki nongkitkam ka Seng Samla Mawkhar bad ki paid nongshong shnong.
Ha kane ka jingrakhe la pyllait ïa ka Souvenir ne ka kot sah kynmaw jong ka jingrakhe ïa ka jingdap 25 snem jong ka Seng Samla Mawkhar bad la sam ruh ïa ki khusnam sha ki khynnah bad ki samla kiba la jop ha ki jingïakob bapher bapher.