Kwah ka sorkar ban bteng ka jingïakren bad ka seng HNLC kat kum u pud jongka Riti Synshar ka Ri

Shillong, Kyllalyngkot 27: U Lat ka jylla u Phagu Chauhan ula ong ba ka jylla Meghalaya ha u snem ba la dep ka la mad ïa ka shongsuk shong shngaiñ kumta ruh ka sorkar ka long kaba kloi bad kwah ban bteng ka jingïakren bad ka kynhun kieng atiar Hynniewtrep National Liberation Council (HNLC) hapoh u pud jong ka riti synshar ka ri.
U Lat ka jylla ula kren ïa katei kum u Kongsan ba pynher ia ka lama ka ri bad shim salute ha ka jingrakhe ïa ka Republic Day kaba 75, kaba la long ha ka sngi Thohdieng ha Madan Polo, Shillong.
U Lat ka jylla haba kren ha ka jingïalang ula ong, ba ka Republic Day ka dei ka sngi kaba khraw bad dei ban ïeng skhem ha ka ban bat ïa ka nongrim kumba la thoh ha ka riti synshar ka ri bad ula pynpaw ïa ka jingsngewnguh bad ai burom ïa ki nongialam ka ri bad ïa ki khla wait jong ka jylla bad ïa ki riewshlur kiba la pha la ka jongim ban ïada ïa ka ri.
“Ka sorkar ka ïeng skhem ban pynneh ïa ka shongsuk shongsaiñ ha ka jylla bad sa shisien ka ïeng skhem ha ka nongrim ba ka long kaba kloi ban ïakren bad ka seng HNLC katkum ka riti synshar ka ri bad katkum ki kyndon jingbthah jongka Ministry of Home Affairs” ong u Lat ka jylla u Phagu Chauhan.
“Ha u snem ba la dep ka jylla ka la mad ïa ka shongsuk shongsaiñ bad ngi la ïaid shakhmat ha ka ban pynbeit ïa ka jingïakajia pud hapdeng ka Meghalaya bad Assam. Hadien ka jingthaw ïa ka histori ïa ka jingïasoi ïa ka Soskular ha u Lber 2022 na ka bynta ki 6 tylli ki jaka kiba don hapdeng ka jingïakajia pud, ki kam ban sorbe ïa ki jaka ki la ïaid shakhmat ban phiah ïa u pud u sam. Ki arngut ki Myntri Rangbah kila ïakynduh biang ha u Jymmang 2023 ban sdang ïa ki kam ki jam ban pynbeit noh ïa u pud u sam jong ki 6 tylli ki jaka kiba don hapdeng ka jingïakajia pud bad la thaw ïa ki Regional Committee ha kitei ki thaiñ bad kila lum ïa ki jingïalang bad ka jylla Assam” ong u Lat ka Jylla.
Ula ong ba ka Tnad Home (Police) ka la sdang ïa ka District-Level Police Infrastructure bad Police Housing bad la nang pynkhlaiñ ïa ka Fire Emergency Services katkum ka jingdonkam. Yn pyndep ha ka por kaba biang ïa ka jingthungkam na ka bynta ki 3000 tylli ki kam kiba lait.
Ula ong, ba ka Meghalaya kala pdiang ia ka State Anthem kaba rakhe ïa ka jaka, ki briew bad ka kolshor da kaba buh hakhmat ïa ka jingïatylli bad la thaw ïa ka Anthem ha ki ktien sorkar katkum ka Meghalaya State Language Act 2005.
U Lat ula kren ruh ha kaba ïadei bad ki kam pynroi kiba ka sorkar kala leh na ka bynta ban kyntiew ïaka roi ka par bad ïa ka ïoh ka kot jong ka jylla bad ula pynbna ba kan long ka jingsahnam ha ka histori, ha kaba ka yn plie ïa u motdur ba shi rynnieng jong u Tirot Sing Syiem ha Dhaka Bangladesh ha ka 16 tarik u Rymphang 2024.
“Da kaba ïaid ryngkat lang bad ka jingangnud u Myntri Rangbah duh ka ri u Narendra Modi ban pynlong ïa ka ri India ka ban kynjoh ïa ka ioh ka kot kaba 5 Trillion US Dollar ha u snem 2025, ka sorkar Meghalaya ka la buh ïa ka thong ban pynlong ïa ka Meghalaya ba kan kynjoh ïa ka ïoh ka kot kaba 10 Million US Dollar ha u snem 2028 ka ban kyntiew arshah ïa ka GDP jongka jylla. Ban pynurlong ïa kane, ka sorkar ka dang pynkhreh ïa ki buit treikam ban roi ha baroh ki liang bad ka dang ïaid ha ka lynti ban pynbiang ïa ka jingbei tyngka” ong u Lat.
U Lat ula kren ruh ha kaba ïadei bad ki kam pynroi kiba ka sorkar ka la leh na ka bynta ban kyntiew ïa ka roi ka par bad ïa ka ïoh ka kot jong ka jylla, da kaba pynbiang ïa ki surok bad ki lynti ki syngkien, ka umbam umdih ha man la ki ïing, ban pynbiang ïa ka bording elektrik bad ba kan ym don kano kano ka jingthud, ka jingtei ïa ka Mawdiangdiang Administrative City bad ïa ka Secretariat kaba thymmai ha New Shillong Township bad ka sorkar ka dang pynkhreh ban tei ïa ka Knowledge City kaba thymmai ha Mawkhanu.
Ban wanrah ïa ka jingkylla ha ka nongbah, ka sorkar kan sdang pynïaid noh da 100 tylli ki bos elektrik hapoh u snem 2025 bad kane kan ïarap ha ka ban pynduna ïa ka umphniang bad ka sorkar ka dang wad ïa ki lad ki lynti ban don noh ka jingkamai ki liengsuiñ kaba man la ka sngi na Shillong sha Delhi, Mumbai, Hyderabad bad Bangalore bad ka sorkar ka don ïa ka jingthmu ban pyntreikam pura noh ïa ka Baljek Airport ba kan don ka jingkamai ki liengsuin na Tura sha Shillong.
U Lat ka jylla ula kren ruh ha kaba ïadei bad ka jingthmu ka sorkar ban kyntiew ïa ka kam rep kam riang bad ki kam ri ïa ki jingri ki bapher bapher, ka jingkyntiew ïa ka kam jngohkai bad kiwei kiwei kiba long ki lad ban aikam aijam.