Kyntu ka sorkar ïa ki nong Meghalaya ba don shabar ri ban pynrung kyrteng online

Shillong, Jymmang 18 : Ka Sorkar Jylla ka la kyntu ïa ki samla pule bad kiba trei shabar ri kiba dei na ka Jylla lane kiba sah shipor shabar ka Ri ba kin pynrung kyrteng noh ïalade lyngba ka kor online ha ka portal ka Jylla, haba kdew ïa ka jingdonkam ban ïoh jingtip kloi lada jia kino kino ki jingjia ba kyrkieh ïa ne ka central database ban pynlah ïa ka Sorkar ba kan pynkynriah mar mar bad ai jingïarap ha ki por ba don ki jingjia ba hap leh kyrkieh.
Ka jingpynbna ba la pynmih da ka Tnad Kam Pohïing (Political) ka la ban jur ïa “ka jingdonkam kyrpang ban pynrung kyrteng hi da lade na ki samla pule bad ki nongtrei na Meghalaya kiba sah shipor shabar ka Ri ”.
Ki Ophisar ki ong ba ïa kane ka sienjam la shim hadien ka jingïohi ïa ki jingeh kiba mih na ki jingjia kiba jia ha ki por ba la leit. ‘Ka Sorkar ka la shem ba ki don bun ki nongtrei bad ki samla pule na Meghalaya kiba trei shipor lane leit pule ha kylleng ki ri ka pyrthei,ong ka jingpynbna.
“Ia mynta, ka Sorkar kam pat don satia ïa ka central database ban buh jingkheiñ ïa kine ki nongtrei bad ki samla pule kiba sah shabar ka Ri. Namar ka jingbym don ka jingkheiñ, ka la long ka jingeh kaba khraw ïa ka Sorkar ban ïoh ïa ka jingtip kaba dei haba ïadei bad ka jingdon ki nongshong shnong kiba sahkut ha ki por ba mih ki jingjia ba kyrkieh kum ki thma, ka jingïaumsnam, ka jingïakhih lane kino kino ki jingïakynad ha ki ri nongwei”.
Kane ka database ba thmu ban buh ka dei kaba la leh da ka jingmut ban pynbeit ryntih ïa kiei kiba hap ban leh ha ka khep ba mih kino kino ki jingjia. “Khnang ban pynthikna ïa ka jingleh kloi bad ki kam kiba treikam bha ha ka por haba donkam kyrkieh, ka Sorkar ka sngew ba ka long kaba donkam ban thaw ïa ka central database ïa ki nongtrei bad ki samla pule kiba dei na Meghalaya kiba sah shipor shabar ka Ri” kala ong “Kane ka database kan long kum ka jingpyni kaba kongsan ha ka ban pynkloi ban ioh jingtip lada donkam ban pynkynriah kyrkieh, ka jingwan ïalam pat, bad ka jingwanphai suk ki nongshong shnong sha la ïing ha ki khep ba mih kino kino ki jingjia”.
Kat kum kane ka jingpynbna, “baroh ki nongtrei bad ki samla pule kiba thmu ban leit shabar ri ban trei lane pule, kumjuh ruh kito kiba la trei lypa ne pule lypa shabar, ki lah ban ai ïa ki jingtip ba bniah kum ka kyrteng, ka jingtip kumno ban ïoh ïakren ïa ki, ka jaka sah ba pura ha Meghalaya, ki jingtip ba bniah shaphang ki Kmie Kpa ne ki nongri nongsumar, ka jaka ba ki sah ha ki ri nongwei, bad kiwei ki jingtip kiba donkam lyngba ka online portal ha http://meghalayaone.gov.in.”
Katba ka jingpynrung kyrteng ka dei da ka mon sngewbha lajong, ka Sorkar ka pynpaw ba ka ai jingkyrshan skhem ïa kane. “Watla ka jingpynrung kyrteng kam dei kaba hap leh beit, la pynshlur ïa ki nongtrei bad ki samla pule ba kin pynrung kyrteng ïalade bad ai ïa ki jingtip kiba donkam khnang ba ka Sorkar kan lah ban ai jingïarap ïa ki ha ki khep ba ki donkam kyrkieh lane ba don kino kino ki jingjia” ong ka jingpynbna.
Haba pynthikna ïa ka jingïada ïa ki jingtip ba shimet, ka Sorkar ka la bynrap “Ka Sorkar ka la kular ba ïa baroh ki jingtip bala ai da ki nongtrei ne ki samla pule yn sa buhrieh pyrrkhing bha bad yn ym buh ha ki rynsan ba ki paidbah ki lah ban ïohi. ïa kine ki jingtip yn khmih tang ha ka por ba don ki jingjia ba hap ai jingïarap kyrkieh”.