Ka sorkar ka kren ka roi ka par, ha kajuh ka por ka aiti pat ïa ka spah ka phew sha kawei ka kompeni: HYC

Shillong, Jymmang 18: Ka Hynñiewtrep Youth Council (HYC) sengkmie ka la pynpaw ka jingpyrshah kaba jur halor ka jingaiti jong ka tnat PHE ïa ka projek kaba kot T. 1900 klur sha kawei ka kompeni ba na jylla Hyderabad kiba pynthup ruh kiwei pat ki projek pynroi kiba la aiti sha ka BAC Infratech Pvt. Ltd kaba la kot ruh lajan 2 hajar klur tyngka kaba ki kontraktor trai jylla bad ki nongsengkam trai jylla pat la kyntait noh bad shah iehnoh ha la ka jong ka jylla.
Ka HYC ka la ong ba ki jingshisha kiba la paw paidbah ba ki projek kiba kot jan 2 hajar klur la ai tang sha kawei ka kompeni nabar jylla ki long kiba pynkyndit jingmut ïa ki paidbah ka jylla bad kaba la pynjah burom, naba kane kam dei tang shaphang ki kam kontrak hynrei ka long halor ka jingpynsyrtok bad ka jingïuhroit ïa ki sap ki phong jong ki trai jylla, ki engineer trai ri bad ïa ka jingïoh kam ïoh jam jong ki samla trai ri.
“Kumno ka lah ban long ba kawei ka kompeni kaba ym ju tip paidbah mynshwa ka lah kynsan kynsan ban ïoh lut ki projek ha manla ki distrik jong ka jylla hapoh ka por kaba lyngkot kum kane. Kumno ka lah ban long ba man la ki projek paidbah kiba heh jong ka jylla lah ai ha kajuh ka kompeni katba ki kongtraktor trai jylla ki hap ban ïakhun tang ban im, kine kidei ki jingkylli kiba la sorkar kam lah ban shu sngap mynthi,” ong ka HYC.
Ka la ong ba ka HYC kam lah satia ban ngeit ba kum kine ki jingjia kim lah satia ban jia khlem ki jingïarap na ki bor saiñ pyrthei kiba khlaiñ bad ka jingpynkylla ïa ka rukom treikam ban ai ïa kane ka kompeni. Ka sorkar ka lah ban pyrshang ban rieh hadien ki rukom treikam bad ki kot ki sla hynrei ki paidbah ka jylla kim mat lah. Hajan baroh ki projek umbam umdih ki leit tang sha kawei ka kompeni, ka jingma ka jingïashah liang, ka jingïohnong marwei ka paw ka jingïasylla kaba shai kdar.
“Ka sorkar kam lah ban shu kren ïa kata ka roi ka par hynrei ha kajuh ka por ka aiti noh ïa ka spah ka phew jong ka jylla sha ki kompeni kiba nabar jylla. Ym lah ban pynlong ïa ka Meghalaya kum ka ïew ka hat kaba ailad ïa ki kompeni kiba don jingïadei saiñ pyrthei ban roi katba ki paidbah trai jylla ki shah leh beiñ,” ong ka HYC.
Ka la ong ruh ba ka jingpaw pyrthei ïa ka jingpynkiew dor ïa ki projek da ki spah klur ka la nang pynjur ka jingartatien ha ki paidbah bad ka wanrah ïa ki jingkylli kiba khraw halor ka jingkhuid jingsuba, ka jingkitkhlieh bad ka jinglah ban don ka jingpyndonkam bakla ïa ka pisa paidbah. Ka jingsngap jar jong ka sorkar ka la nang pynskhem ïa ka jingsngew u paidbah ba don eiei kaba la buhrieh.
“Katba ka HYC ka kyrshan ïa ka roi ka par bad ka jingpynbha ïa ki jingtei paidbah, hynrei kata ka roi ka par kam dei satia ban wan da ka jingpynjah ïa ka hok, ka jingkhuid jingsuba bad ïa ki hok jong ki paidbah trai jylla ka Meghalaya. Ka sorkar ka dei ban kynmaw ba ki projek paidbah kim dei ki jingïateh jingïakhun shimet kiba ai jingmyntoi tang ïa ki katto katne ngut. Ki jingïoh jingïarap, ki lad jingïohkam bad ka jingdon jingem jong ka Meghalaya ki dei ban dei ka hok bad jingmyntoi nyngkong eh ïa ki paidbah ka jylla,” ong u President ka HYC u Bah Roy Kupar Synrem.