Saphriang ka shithi ba ai sngewbha ka company Topcem ïa ka party NPP da ka pisa T50 lak tyngka

Khliehriat kyllalyngkot 27: Kumba la paw ha ki social media, kawei ka shithi ba la phah da ka karkhana pynmih dewbilat, ka Meghalaya Cement Limited , lane ka Topcem, sha ka party National People’s Party halor ka jing ai sngewbha ka company sha ka party T50 lak tyngka, kane ka shithi ka dei ha ka tarik 10 u bnai Naiwieng 2023, kane ka shithi ka la saphriang bha ha ki social media.
Katkum ka shithi la ong ba ka dei ka jingai sngewbha da ka company sha katei ka party NPP, lyngba ka cheque ba la draw na ka State Bank of India, Guahati Branch.
Shuh shuh, ha ka shithi, ka company ka la ong ba katei ka pisa T 50 lak tyngka kaba ai sngewbha sha ka party NPP ka long ruh halor ka kyndon aiñ Section 182 jong ka Companies Act, 2013, ïa kane ka shithi la soi kyrteng da u Amit Agarwal, uba dei u Director jong ka company.
Haba ïakren bad u heh jong ka company Topcem, u la kam ba um tip ei ei halor kane bad kam shym don kano kano ka pisa ba la ai sngewbha ïa kano kano ka political party hapoh ka jylla.
Hadien ka jingsaphriang katei ka shithi ha ki social media, ki paidbah ki la kynthoh jur, kaba la pynkynmaw ïa ki ïa kito ki por ba ki shah shoh beiñ ha ki pulit ha ka por ba long public hearing, khamtam eh kito ki nongtrei jong ka topcem kiba la kren da ki ktien khlem akor ïa ki paidah.
Ka la mih ruh ka jingkylli ba hato katei ka jingai pisa ka company Topcem ka lah ban nang pynshlur shuh shuh ïa ka company ban ïoh ban pynheh ïa ka kam khaïi hapoh ka ka jingïada ka sorkar haduh ban da pynduh pyndam ïa ka karkhana dewbilat kaba don ha Sohra , ka Meghalaya Cherra Cements Limited (MCCL).