Pynsangeh ka SC ïa ka hukum ka Meghalaya HC ban siew bailutksan ïa kiba iap ha along ki Pulit

Shillong, K’lyngkot 27: Ka ïing Bisgar Supreme Court ka la pynsangeh ïa ka jingtreikam jong ka hukum ka ïing Bishar High Court jong ka jylla Meghalaya kaba bthah ïa ka Sorkar Jylla ban siew bai lutksan ba kot haduh T.10-15 lak ïa kiba iap ha along jong ki Pulit.
Kane ka hukum ba pynsangeh ba la pynmih ha ka 22 tarik Kyllalyngkot 2024, ka kren shai ba ka hukum jong ka ïing Bishar High Court kan sangeh shuwa ïa ka jingtreikam hynrei halor ka kyndon ba ka bai lutksan ba la buh da ka National Human Rights Commission (NHRC) ka dei ïa ka ban siew da ka Sorkar Jylla.
ïa kane ka jingmudui jong ka Sorkar Jylla la shim rai da ka ïing Bishar Supreme Court ba kynthup ïa u Justice BR Gavai, Sanjay Karol bad Sandeep Mehta haba bthah ban file affidavit hapoh ka saw taiew.
Ha u Nailar 2023, ha ka suo moto case, ka ïing Bishar High Court kala pynpaw ïa ka jingsngewkhia halor ka jingiap jong ki Under-Trial Prisoner namar ka jingpynshitom ba palat pud jong ki bor ba tohkit. Ka la rai ba ka jingiap ki koidi ha along kan kut tang lada ka jingsiew bai lutksan ka poi ha u pud ha kaba ka Sorkar Jylla kan hap ban siew ïa ka jingsiew bai lutksan kaba heh.
Haba kyntait ïa ka ‘Haryana Model’ ban siew bai lutksan da ka NHRC, ka ïing Bishar High Court ka la ban jur ïa ka jing donkam ban siew bai lutksan ka ban ai jingkyrshan ïa ki longïing jong ki lanot bad ruh ban tehlakam ïa ki Ophisar jong ka Jylla.
Ka ïing Bishar ka la buh ïa ka bai lutksan kaba long naduh T. 10-15 lak kaba shong ruh kat kum ka rta jong ki lanot. la ki lanot kiba hapoh 45 snem, ka bai lutksan ka long T. 10 lak katba kito kiba hapdeng 30-45 snem kidei ban ïoh T. 12 lak. ïa kito ki lanot kiba iap hapoh ka 30 snem ha along ki Pulit, ka jingsiew bai lutksan ka long T. 15 lak.
Kane ka rai ka la pynbor ïa ka Sorkar Meghalaya ban leit mudui sha ka ïing Bishar Supreme Court.Ha ki kam ba ïadei bad ka jingiap ha along Pulit, ka National Human Rights Commission ka Ri India (NHRC) ka la buh ïa ka jingdawa ban siew bai lutksan kaba long T. 3 lak.