Shillong, K’lyngkot, 27: Ryngkat bad ka ri India baroh kawei, ka Jylla Meghalaya ha ka sngi Thohdieng ka la rakhe ïa ka Republic Day kaba 75 snem.
Ha kane ka jingrakhe ïa ka Republic Day kaba la long ha madan Polo, Shillong la kynmaw burom kyrpang ïa ki nongïakhun laitluid jong ka ri India bad kumjuh ruh ïa ki khlawait jong ka jaitbynriew, kum u Tirot Sing, u Kiang Nangbah bad u Pa Togan Sangma
U Lat ka jylla Phagu Chauhan uba la long kum u kongsan u la pynher ïa ka lama lai rong jong ka ri India bad shim ruh ïa ka bynta ban salute ïa kiba ïa shim bynta ha ka march pass ba kynthup ïa ki shipai BSF, CRPF, District Executive Force, East Khasi Hills District, Sikkim Police, 1st MLP Bn, NCC Boys, NCC Girls, Meghalaya Bharat Scouts and Guides, Sacred Heart Girl’s Hr. Sc. School, Brass Band Border Wing Home Guards bad ki Pipe Band Assam Regiment Centre.
U Lat ka jylla u la sam ruh ïa ka khusnam ‘U Tirot Sing Award 2024’ na ka bynta ka Arts and Culture sha u Risingbor Kurkalang, ïa ka Pa Togan N. Sangma Award 2024 na ka bynta ka Social Service sha ka Dr. Delphine Gare Momin bad ïa ka “U Kiang Nangbah Award 2024’ ha ki kam ïalehkai sha u Phrangki Buam.
Haba kren kum u Kongsan u Lat ka jylla u la ïaroh ïa ka Sorkar Jylla kaba la pyrshang ban wanrah jingsuk hapoh ka jylla lyngba ka jingkhot ïakren ïasuk bad ka seng kieng atiar Hynniewtrep National Liberation Council (HNLC) katkum ka jingbthah jong ka Ministry of Home Affairs (MHA) ka Sorkar Pdeng.
La sam ruh ïa ki khusnam Megha Health Insurance Scheme (MHIS) & Pradhan Mantri Jan Yojana (PMJAY) Awards sha ki hospital kiba treikam bha bad kiba la ai ka jingshakri kaba paka ïa ki paidbah nongshong shnong.
Ha East Khasi Hills la ai ïa ka khusnam sha ka Pomlum PHC bad ka Mawphlang CHC na East Khasi Hills ka la ïoh ka khusnam kum ka hospital ba ai jingshakri bapakam tam ha ka jylla.
Ki hospital shimet kiba la shah jied ban ïoh khusnam ki long ka Bethany Hospital, Shillong bad ka Bansara Eye Care Centre, East Khasi Hills.
Ka Reid Provincial Chest Hospital, East Khasi Hills District ruh ha kane ka kynti ka la shah pynkup burom da ka khusnam bad ka Ganesh Das Government Maternal & Child Hospital, East Khasi Hills District ka la shah jied kum ka hospital ba paka tam ha ka jingsumar ïa ki kynthei bad ïa ki khunlung.
Shuh shuh ka Reid Provincial Chest Hospital, East Khasi Hills District ka la jop ruh ïa ka khusnam na ka bynta ka Ayushman Bharat Pradhan Mantri Jan Arogya Yojana Quality Certification Hospital.
Ha kane ka sngi, la sam ruh ïa ka Police Medal for Meritorious Service (MSM) sha u Superintendent of Police (City) Bah Vivek Syiem, ïa u AB-Inspector John M Sangma bad Havildar Bah Teibor Sumer, katba ïa ka Home Guards & Civil Defence Medal for Meritorious Service la ai sha ka Kong Aniosca Basaïawmoit kaba dei ka Inspector kaba shakri kum ka Senior Instructor ha Central Training Institute of Civil Defence and Home Guards, Mawdiangdiang.
La pyninam ruh ha kane ka sngi ïa ki tabut na ka tnat Tourism, ophis jong ka Deputy Commissioner, na ka DCIC-East Khasi Hills, na ka ophis Superintendent of Fisheries, na ka Meghalaya State Skills Development Society, na ka District Animal Husbandry and Veterinary, na ka District Horticulture, DFO, na ka Social Forestry, na ka NCC, na ka Divisional Soil and Water Conservation bad na ka District Election Officer.
Ka tabut jong ka DCIC-East Khasi Hills ka la jop ïa ka nam lahduh, katba ka Meghalaya State Skills Development Society ka la long baar bad ka District Animal Husbandry and Veterinary ka la long balai.
Ha ka jingïakob ïaid march past, ka NCC Girls ka la jop ïa ka nam lahduh, katba ka NCC Boys bad ka Sacred Heart Girl’s Hr. Sc. School ki la jop ïa ka kyrdan baar bad balai.
