Shillong, K’lyngkot, 27: U Myntri Rangbah ka Jylla u Conrad K. Sangma u la pynher ïa ka lama lairong jong ka ri ha ka jingrakhe ïa ka Republic Day kaba 75 snem jong ka ri India.
Ha kane ka sngi, u Myntri Rangbah u la pynkup burom ruh da ka khusnam Lifetime Achievement sha u Rodrick D Shira halor ka jingnoh ïa u synñiang u bynhei sha ka jylla bad sha ka ri baroh kawei.
U Rodrick D. Shira uba dei u samla pule barim jong ka IIT Kharagpur ha ka Electronics and Electrical Communication Engineering, u la ïoh pdiang ïa ka Gold medal ha ka bynta Electronics ha u snem 1967 bad u la trei hapoh ka Fertilizer Industries kum u Process Control Engineer bad trei ruh ha FCI Sindri bad u la shakri ha bynta bapher bapher jong ka ri. Hadien ba la jied da ka Public Enterprise Selection Board (PESB) ha u snem 1998 u la long u Director of Production ha ka Bongaigaon Refinery and Petrochemicals Limited ïa kaba la tip mynta kum ka Indian Oil Corporation Limited bad u la shongthait na ka kam ha u snem 2003.
Ha u snem 2017, u la shah jied ban shimti kum u Vice Chancellor banyngkong eh jong ka Captain Williamson Sangma’s Technical University ha Jewilgre da ka Sorkar Meghalaya.
Shuh shuh u Myntri Rangbah u la aiti ruh ïa ka Certificate of Appreciation bad ka Water and Sanitation Award sha ka shnong Kama Galwanggre bad sha ka shnong Babadam bad ïa ka khusnam Top Performing PHC sha ka Darengre PHC kaba la shah jied kum ka shlem jingsumar kaba pyntreikam bha ïa ka MHIS bad ka AB-PMJAY hapoh ka district.
La sam ruh ïa ki Certificate of Appreciation sha ki nongtrei jong ki tnat bapher bapher.
Ha ka jingpyni nam ïa ki tabud, ka Tura Municipal Board ka la ïoh khur ïa ka nam lahduh, ka District Commerce and Industries Centre ka la ïoh khur ïa ka kyrdan kaba ar bad ka tnat Election ka la ïoh khur ïa ka kyrdan kaba lai.
U Myntri Rangbah u la kaweh lama ïa ki kali na ka bynta kiba ïashim bynta ha ka Bilgaro Republic Day Run 2024 ban pynsngewthuh paidbah halor ka jingshngaiñ haba niah kali ia kaba la pynlong da ka Tura Motor Sports Club, Tura.
Ha ka por mynsngi la pynglong ïa ki jingïalehkai sports na ka bynta ki heprit bad ïa ka Exhibition Football match kaba la long hapdeng ka DC XI bad ka Medical XI ha P A Sangma Stadium, Dakopgre, Tura.
Ïa ka jingrakhe Republic Day la pynlong ruh ha Raksamgre bad Dadenggre Civil Sub-Divisions ha kaba u Limison D Sangma, MLA bad u Brening A Sangma, MLA ki la long ki kongsan.
Ha Williamnagar, u Myntri ka tnat Pule Puthi Rakkam A Sangma u la pynher ïa ka lama lairong. Ha Ampati u Myntri ka tnat PHE Marcuise N Marak u la pynher ïa la lama lairong bad sam ruh ïa ki khusnam sha ki nongjop ha ka jingpyni tabut ba kynthup ïa ka tnat DCIC, ka tnat Labour bad ka tnat PHE, katba ïa ka khusnam Best Marching Contingent la ïoh da ka St. Dominic Savio Higher Secondary School, ka St. Claret Secondary School Scouts bad ka Birin-Nuchong School Scouts.
La sam ruh ïa ki jingbam sha ki nongpang ka Ampati Civil Hospital, ka jingpylong ïa ka jingïalehkai Cricket hapdeng ki bor synshar district bad ka tnat Pulit.
Ha Resubelpara u Symbud Myntri Rangbah Sniawbhalang Dhar u la pynher ïa ka lama lairong bad sam ruh ïa ka khusnam sha ka ophis Soil & Water Conservation kaba la shah jied ban ïoh pdiang ïa ka Best Tableau Award.
Katba ïa ka Best Marchpast la ïoh da ka Resubelpara RMSA Secondary School.
La pynkup burom ruh ïa ki shakri sorkar hapoh ka district, la sam ruhh ïa ki khusnam sha ki ASHA bad sha ki nongïalehkai kiba la wanrah ïa ka nam ka burom sha ka District ha ka 5th Meghalaya Games kaba la long dang shen ha Tura.
Ha Baghmara u Myntri ka tnat Bording u A. T. Mondal u la pynher ïa ka lama lairong bad ha ka jingpyni nam ïa kit abut, ka ophis Soil and Water Conservation, ka DCIC bad ka Agriculture and Farmers’ Welfare ki jop ïa ka khusnam banyngkong, baar bad balai.
Ka Siju PHC ka la shah jied ban ïoh pdiang ïa ka khusnam Best Performing PHC hapoh ka South Garo Hills hapoh ka Megha Health Insurance Scheme bad ka Baghmara Civil Hospital ka la shah pynkup burom kum ka Best Performing District Hospital ha ka jylla hapoh ka Megha Health Insurance Scheme.
Ha Jowai u Myntri ka tnat Animal Husbandry and Veterinary Bah A.L Hek u la pynher ïa ka lama lairong bad ha ka jingpyni tabut, ka ophis Horticulture ka la ïohrah ïa ka nam lahduh, katba ka District Commerce & Industries Centre, bad ka Divisional Soil and Water Conservation, Territorial Division Jowai ki la ïoh rah ïa ka nam kaba ar bad kaba lai.
La sam ruh ïa ki khusnam Top Performing PHC ha kaba ka Sahsniang PHC ka la shah pynkup burom da ka khsnam Best Performing Public Health Centre (PHC) halor ka jinglah ban pyntreikam bha ïa ka Megha Health Insurance Scheme (MHIS) bad Ayushman Bharat Pradhan Mantri Jan Arogya Yojana) (AB PM- JAY).
Ha Khliehriat, u Myntri ka tnat Sports and Youth Affairs Bah Shakliar Warjri u la pynher ïa ka lama lairong bad bad sam ruh ïa ka khusnam sha ka Rymbai PHC kaba la shah jied kum ka shlem ai jingsumar kaba la pyntreikam bha ïa ka MHIS & Ayushman Bharat-PMJAY.
Ha kajuh ka por, ka Rotary Club, Jowai ka la pynkup burom ruh ïa ka Anti-Narcotics Task Force (ANTF), East Jaiñtia Hills District. Ki nongkitkam jong ka One Stop Centre, Khliehriat ki la ïoh pdiang ïa ka khusnam halor ka jingithuh ïa u synniang u bynhei ba ki la lah wanrah ïa ka project ‘Assisting women in Accessing Justice (AWAJ)’, ban ai jingtip sha ki nongshong shnong ha kaba bad ki jingshah thombor bad ban pynshlur ïa ki paidbah ba kin wanrah ïa ki jingkylli.
La sam ruh ïa ki khusnam sha ki nongjop ha ka March Past ha kaba ka Little Star Secondary School, Lad Rymbai bad ka Jawahar Navodaya Vidyalaya (JNV), Rymbai ki la shah jied kum ki nongjop.
Ha ka jingpyni kolshor ka Jawahar Navodaya Vidyalaya (JNV), Rymbai bad ka Khliehriat Higher Secondary School, Khliehriat ki la long ki nongjop bad ha ka jingpyni tabut District Rural development Agency (DRDA), East Jaiñtia Hills District ka la shah jied kum ka tabut ba itynnat tam bad ka tabut jonjg ka Agriculture Department ka la ïoh rah ïa ka kyrdan kaba ar.
Ha Nongstoin ka Myntri ka Koit ka Khiah ka Dr. M Ampareen Lyngdoh ka la pynher ïa ka lama lairong bad ha kane ka sngi la pyni nam ïa kit abut da ki tnat treikam bapher bapher ka sorkar.
La pynlong ruh ïa ka jingïalehkai phutbol hapdeng ka Nongstoin Football Association bad ka Officers Club Nongstoin (Veteran). La sam ruh ïa ki jingbam ha Civil Hospital, ha St. Peter’s Green Pasteur Orphanage, Pyndengrei, ha Rev. S. Wollington Children’s Home, Nongpyndeng bad ha Shelter Homes for Boys and Girls, Nondein.
Ha Mawkyrwat, u Myntri ka tnat Revenue and Disaster Management Minister Bah Kyrmen Shylla u la pynher ïa ka lama lairong jong ka ri bad la pynbud pat sa ka jingpyni ïa ki tabut da ki hynriew tylli ki tnat treikam ka Sorkar, ka jingpyni ïa ka kolshor, ka jingsam ïa ki khusnam sha ki nongjop ha ka March Past.
Ka J.K.M.P. Higher Secondary School ka long ka nongjop ha ka March Past, katba ka Little Start Higher Secondary School bad ka Maharam Government Higher Secondary School ki la jop ïa ka kyrdan kaba ar bad balai.
Ha ka jingpyni tabut, ka ophis PHE ka la ïoh rah ïa ka nam lahduh, bud sa ka ophis Deputy Commissioner (Election) kaba la wan baar bad ka ophis Divisional Soil and Water Conservation kaba la wan balai.
La sam ruh ïa ka khusnam sha ka Umjarian HWC-SC kaba la shah jied kum ka Best Performance Health and Wellness Centre ha ka District, bad ka Nongbah Marshillong Village ka la shah pynkup burom kum ka Best Village Health Council hapoh ka District.
Ha Nongpoh u Symbud Myntri Rangbah Bah Prestone Tynsong u la pynher ïa ka lama lairong bad la pynbud pat sa ka jingpyni ïa ki tabut da ki tnat treikam bapher bapher jong ka sorkar.
Ha Mairang u Myntri ka tnat Food Civil Supplies & Consumer Affairs, Bah Comingone Ymbon u la pynher ïa ka lama lairong bad la pynbud pat sa ka jingpyni ïa ki tabut da ki tnat treikam ka sorkar ha kaba ka ophis Sub-Divisional Agriculture Officer ka la shah jied kum ka nam lahduh, ka ophis Block Development Officer ka la jop ïa ka kyrdan baar bad ka ophis Fishery Officer ka la jop ïa ka kyrdan balai. Ha ka jingïakob pyninam ïa ka kolshor ka Seng Khasi Secondary School, Pyndengumiong ka la ïohrah ïa ka nam lahduh , katba ka St. Thomas Higher Secondary School, Mairang bad ka Multipurpose Secondary School, Lumrit Sohdadek ki la jop ïa ka kyrdan kaba ar bad kaba lai.
Ha Sohra Civil Sub-Division u Myntri ka tnat Arts & Culture Minister Bah Paul Lyngdoh u la pynher ïa ka lama lairong bad shim ruh ïa ka Salute jong ki shiphew tylli ki kynhun kiba ïaid march past ba kynthup ïa ka East Khasi Hills DEF, ka NCC bad ki skul.
Ha Dadenggre Civil Sub-Division u MLA Brening A Sangma u la pynher ïa ka lama lairong.
Ha Amlarem Civil Sub-Division u Bah Lahkmen Rymbui u la pynher ïa ka lama lairong bad shim ïa ka Salute ha ka jingrakhe kaba la long ha Amlarem Government Lower Primary School.
Ha Pynursla Civil Sub-Division u Bah Banteidor Lyngdoh u la pynher ïa ka lama lairong.
Ha Mawshynrut Civil Sub Division ka Kong Santa Mary Shylla ka la pynher ïa ka lama lairong.
Ha Raksamgre Civil Sub-Division u Limison D Sangma u la pynher ïa ka lama lairong.
Ha Chokpot Civil Sub-Division u Sengchim N Sangma u la pynher ïa ka lama lairong.
Ha Ranikor Civil Sub-Division u Bah Pius Marwein u la pynher ïa ka lama lairong.
La pynlong ruh ïa ka cultural programme, bad ki jingïalehkai sports na ka bynta ki khynnah rit bad ka jingsam mitmit sha ki khynnah da ka Integrated Child Development Services (ICDS), Ranikor, bad ka jingsam khusnam sha ki nongjop ha ka march past ha kaba ka Jingaiti Secondary School, Nonghyllam, ka la long ka lahduh, katba ka Nolikata Higher Secondary School ka la jop ïa ka kyrdan kaba ar bad ka Indira Gandhi Secondary School, East Rangasora ka la jop ïa ka kyrdan kaba lai.
Ha Patharkhmah Civil Sub-Division u Bah Damanbait Lamare u la pynher ïa ka lama lairong.
Ha Jengjal Civil Sub-Division u Deputy Speaker ka Ingdorbar Thawain u Timothy D Shira u la pynher ïa ka lama lairong.
Ha Dalu Civil Sub-Division Ian Botham K Sangma u la pynher ïa ka lama lairong.
Ha Rongjeng Civil Sub-Division u Jim Sangma u la pynher ïa ka lama lairong.
Ha Hima Shangpung, Laskein C & RD Block u Bah Wailadmiki Shylla u la pynher ïa ka lama lairong.
