Shillong, K’lyngkot, 27: Kum ka jingpynshlur ïa ki samla pule, ka Seng Samla Shnong Umpling ha ka sngi Thohdieng ka la pynkup burom ïa ki 13 ngut ki samla jong ka shnong kiba la pyndep ïa ka jingpule ha ki kyrdan bapher bapher.
Ïa kane ka jingsam khusnam la tip kum ka Academic Excellence Award ïa kaba la bei tyngka da ka Chief Minister Special Grant, ha kaba u Chief Executive Member (CEM) jong ka Khasi Hills Autonomous District Council u la long kum u kongsan.
Nalor kine ki 13 ngut, ka Seng Samla Shnong Umpling ka la pynkup burom kyrpang ruh ïa ki ar ngut ki samla jong ka shnong kiba la tyngshaiñ bha kiba kynthup ïa u Bah Shanbor Warjri uba la long u u Additional Deputy Commissioner jong ka East Khasi Hills District bad ka kong Quinnie Fancon kaba la pass ïa ka eksamin MPS.
Haba kren kum u kongsan u Bah Pynïaid u la ong ban lait na ka jingshah synshar ha kiwei pat ki jaidbynriew, ki khun samla jong ka jylla ki dei ban trei shitom khnang ba ki lah ban pass ïa ka eksamin IAS ba ju pynlong da ka Union Public Service Commission (UPSC) bad u la kular ba lada don ki khun samla na ka shnong Umpling kiba thrang ban ïakhun ïa kane ka eksamin u long uba kloi ba kyrshan na ka bynta ka bai Coaching.
