Shillong, Nohprah, 05: U Symbud Myntri Rangbah uba khmih ïa ka tnat Pynroi Sor u Bah Sniawbhalang Dhar ha ka sngi Palei u la kular ia ki nongïalam jong ka seng ki nongdie madan ba ka Sorkar Jylla kan sa pyrshang ban pynkynriah ïa ki sha ka jaka kaba paka kaba kin dup lah ban kamai manla ka sngi.
Ha ka jingïakren bad ki lad pathai khubor hadien ba la wai ka jingïalang, u Bah Dhar ula ong ba u la kyrpad ïa ki nongïalam jong ka seng ki nongdie madan ba kin ïatreilang bad ka Sorkar khnang ba kan dup lah ban pynurlong ïa ka jingdawa.
“Nga la ïathuh ïa ki ban ym khuslai namarba ngan don ryngkat bad phi. Sngewbha ïatreilang bad ka Sorkar, ngin sa pyrshang ban pynkynriah ïa ki sha ka jaka kaba paka. Long kiba ïaishah bad ka Sorkar. Phi lah ban ïoh ha ka jaka kaba phi kwah, ngi lah ruh ban ym ïoh ïa ka jaka kaba ngi kwah hynrei nga ngeit ba ngin sa lah ban ïaleh katba lah ban pynïoh ïa ka jaka kaba paka. Nga kyrpad ïa ki ban ïatreilang bad ka Sorkar bad ma ngi ruh ki kmen ïa kata ka jingkyrpad,” u la ong.
“Ki dei hi ki hymmen bad ki para jong ngi. Ngim lah ban shu bret ïa ki kumto. Ngi sa shim lang kawei ka rai ryngkat bad ki. Ïa mynta, ngi la ithuh katto katne tylli ki jaka, ngin sa shim rai ha ka jingïalang ryngkat bad ki lem bad ki ophisar,” u la bynrap.
U la pyntip ba ka Sorkar kan sa pynkynriah nyngkong eh haduh 600 spah ngut ki nongdie madan ba ladep ai kyrteng.
Katkum ka jingong jong u, kam don kano kano ka jingkyntait na ki nongdie madan ïa ki 3-4 tylli ki jaka ba la ithuh kum ki jaka die madan.
Haba kylli, u Symbud Myntri Rangbah u la ong, “kam mut ba ka Sorkar ka jem bad ma ki, ki eh. Kam long kumta, Haoid, lada don mano mano ba wan ban shong ha surok bad ha ki lynti ïaid kjat dei na kata ka daw ngi hap ban pyrkhing ha ka rukom kaba dei khnang ba kan ym pynwit ïa ka leit ka wan jong ki briew kiba ïaid ha ki lynti ïaid kjat ne ha ki jaka ba bun briew.”
