Lai tylli ki skill lab yn buh ka sorkar ha ki lai distrik

Shillong, Nohprah 05 : Ka sorkar jylla ka la pynkhreh mynta ban tei haduh lai tylli ki skill lab ha ka jylla ban ïarap ïa ki samla pule ba kin ïoh shuh shuh ïa ki jingpyntbit nalor ka kam kaba ki la don jingtbit la ka long ha ka nursing, MBBS bad kiwei kiwei.
Ïa kine ki skill lab ka sorkar ka thmu ban buh ha Shillong – East Khasi Hills,Tura – West Garo Hills bad ha Nongstoiñ – West Khasi Hills.
Haba kren bad ki lad pathai khubor, ka Myntri ka tnad ka Koit ka Khiah ka sorkar jylla, Kong Ampareen Lyngdoh kala ong ba kine ki skill lab mynta ki dei kiba donkam bha na bynta ki samla pule bad ki nongshong shnong ka jylla ban ïoh ïa ki jingtbit khnang ba kin long kiba pyntbit wat ban leit trei shabar ri.
“Naduh ka ri Korea, Japan, England bad Singapore ki mad ïa ka jingkyrduh nongtrei, kumta ka skill lab kaba don ha ka jylla kum ha Shillong,Tura bad Nongstoiñ kan ïarap ïa ki samla pule jongngi bad kumjuh ïa ki nongshong shnong ba kin ïoh ïa ka lad ïohkam ha kine ki ri,” la bynrap biang ka Myntri.
Shuh shuh ka ong ruh ba ka jingtyrwa mynta ka dang ïaid hynrei ïa ki jaka la dep ban jied ban buh ïa kine ki skill lab.
“Ngi la dep ban kren bad u Myntri Rangbah ka Jylla bad nga ngeit ba yn ym don ban kyrngah ba ka skill lab kadei kaba la donkam kyrkieh ha kine ki lai jaka ha ka jylla ban pynkhreh ïa ki nongshong shnong ban ïoh ïa kine ki lad ïohkam,” ka la ong.
Nalorkata, ka ong ruh ba lada ki samla kim lah ban ïoh ïa ka lad kamai ha la ka jong ka jylla, ka sorkar kam shong kli kti namar ka sngewkhia ïa ki jingeh kiba bun.