Shillong, K’lyngkot, 07: Ka All India Trinamool Congress (AITC) kaba shong ha ka Liang Pyrshah jong ka Iingdorbar Thawaiñ ka Jylla ka la kular ban pynneh bad ban ai jingïada ïa ki nongkynti bad ïa ki hok laitluuid ha ka ri India khnang ban ka synshar paidbah kan dup im pateng la pateng.
“Ka dei ka kamram jong ngi ban pynthikna ba ngin ïada la ka long ha kano kano ka rukom ïa ka hok laitluid bad ïa ka jinglong kyrpang jong kane ka ri kaba khraw khnang ba ka synshar paidbah kan dup im pateng la pateng,” ong u Mukul Sangma uba long u Nongïalam jong ka AITC Legislature Party bad u Nongïalam ka Liang Pyrshah ha ka jingïakren bad ki lad pathai khubor ha ka sngi Thohdieng.
Haba pynpaw ba ka niam ka dei ka jingjied laitluid jong u briew shimet, u Sangma u la ong, “kane ka ri kaba khraw ka la lah ban pynkha ïa ka saiñpyrkhat ba kane ka dei ka ri kaba ngi burom ïa ka jingsngew shimet, ngi burom ïa ka hok laitluid bad ym tang ba ngi burom, ngi pynneh bad ngi ïada ïa ki hok nongkynti bad kane ka dei ka bynta kaba kongsan tam jong ka Riti Synshar jong ka ri India.”
Une u Myntri Rangbah barim ka Jylla u la ong ba mynta ka kamram kaba kongsan ka long ban pynthikhna ba ïa ki hok laitluid jong ngi kim dei ban shah teh shah khum ha kino kino ki polisi lane ha kano kano ka aiñ kaba thymmai ba la pyrshang ban wanrah da kino kino ki seng saiñpyrthei ha ka ri India.
U Sangma u la kynthoh ïa kane halor ki jingjia bym sngewtynnnat ba la pynmih ha ki lad pathai khubor ha ka ri baroh kawei bad takraiñ ruh ïa ka Sorkar kaba ailad ïa kine ki kam thombor khlem da pynshitom ïa kiba donkti.
“Mynta ngi don ka jingsngewkhia ïa ki nongshong shnong ha ka ri kiba la shah teh shah khum ïa ka jingjied shimet, ka hok laitluid bad ban ailad ïa ki nongthohbom ban wanrah ïa kine ki jingjia kiba pynshong syier ïa ki paidbah bad ka Sorkar ka ailad ba kin nang ïai bteng khlem da pynshitom ïa kiba donkti. Kane ka dei ka kam kaba sngewkhia haduh katta katta,” u la ong.
Ka dei ka jingma kaba ap ïa kane ka ri kaba khraw bad ki ban ki daw ki ban ktah ïa ka nongrim ba la seng ha kane ka ri ban kiew shaphrang, ban plung bad ban long ka ri kaba khlaiñ, la ong u Sangma.
Haba kdew ruh ïa ka jingjia ha Assam kaba ïadei bad ka jingpan jingtip halor ka jingdon kiba la shah pynkylla niam bad ka jingdon jong ki Iingmane ba la tei ha ki district bapher bapher hapoh shi snem, une u nongïalam ka AITC u la ong, “mynta nga kwah ban ong ïa u Myntri Rangbah ka Assam halor ka jinglen jong u ding ding dang dang ba ïa kane ka kam la leh khlem ka jingtip jong u. Lada ka dei kaba la shu leh khlem ka jingtip jong u, kan dei ka kam jongno pat namarba ka shongsuk shongsaiñ ka dei ka kamram jong ka Sorkar Jylla. Hato u Myntri Rangbah u la shimkhia halor kano kano kano ka rai ba la shim da ki nongtrei sorkar kaba long pyrshah ïa ka rukom treikam jong ka Sorkar? Kine ki dei ki jingkylli ba ki paidbah ki dei ban buh.”
