Shillong, K’lyngkot 07: Ki shipai BSF jong ka BOP Kakergora, 193 Bn BSF ha ka 6 tarik mynta u bnai ki la ïoh kurup haduh 300 Kilogram u shñiuh briew uba shongdor T.30 Lak.
Une u shniuh briew uba ki shipai BSF ki ïoh ban kurup u dei uba la pynkit na nongbah Shillong sha ka shnong Jamador, South West Khasi Hills na bynta ban shalan be-aiñ sha ka ri Bangladesh.
Ïa kitei ki shniuh briew kiba la ïoh kurup da ki shipai BSF la aiti noh sha ka tnad Custom Balat, East Khasi Hills, Meghalaya.
Dei dang ha kine ki khyndiat por ba ka ri Bangladesh ka la kylla long ka ktem na bynta ban khaïi shñiuh bad na kane ka ri la shalan ïa kitei ki shñiuh sha China bad Taiwan bad ha ki khyndiat por ba kham mynshuwa ïa ki shñiuh la ju shalan sha na Myanmar.
Ïa kitei ki shniuh briew la pyndonkam ban shna ïa ki ‘Wig’ ïa kaba jingdawa ka jur bha bha kylleng satlak ki ri.
Ha u snem ba la dep ki BSF ki ïoh kurup 225 Kilo u shñiuh briew na ki thaiñ khappud bad ka ri Bangladesh.
