Nga kloi ban long u nonglum shuki bad ngan trei shitom na ka bynta u Dr. Nonglait: Conrad

Shillong, Jymmang 7: U National President ka National People Party (NPP) uba dei ruh u Myntri Rangbah ka jylla u Conrad K Sangma u la ong ba naduh kane ka sngi haduh ban da kut ka election MP shiteng, “Ngan long u nongtrei ba shit rhem bha jong u Dr. DRL Nonglait”.
Haba kren ha ka jingialang hadien ba la dep ban pynbna ïa u Dr. Nonglait kum u kyrtong jong ka party u Conrad u la ong,”Nga long uba la kloi ban long kum u nongteh lama, nongteh banner bad ngan da trei shitom na ka bynta u Dr. Nonglait”.
“Ngam tharai ba kiwei kiwei ki seng sain pyrthei kin ioh ia u kyrtong ba kham lah ban ia u Dr DRL Nonglait, u briew uba ngeit ba ka dei ki kam kiba kham kongsan, u briew uba leh ia kaei kaba kren, u briew uba la pynshisha ialade bad u briew ula ngeit ha ka ban pyniatylli ia ki briew jong ngi ym ban pyniapait iapra ia ki” ong u Conrad.
Halor ka profile u Dr Nonglait, u Conrad ula ong “Nga sngew burom shisha ba mynta ka sngi ngi la lah ban pdiang ïa u briew shimet, u briew, u rangbah u bym donkam ban pynithuh, nalor ba long napdeng ki top ten professor hapdeng ki Khasi ha Meghalaya, nalor ba don ha ka Khasi Author Society la palat 22 snem bad long President ïa palat 12 snem….u Dr Nonglait ha ka shikyntien u dei u briew uba im palei bad ba sngewrit, uba ieid ïa ki paidbah bad uba ieid ïa ka Jylla”.
Shuh shuh u Conrad u la ong, U Dr Nonglait ula buh ia ka nuksa ka jingaiti lut, ka jingbym kynran dien, ka jingisih ia ki kam thombor bad pynshisha ba lada ki jingthmu jong ki ki dei kiba dei, lada ka mynsiem jong phi ka dei ha ka jaka kaba dei, bad ka jingkut jingmut jong phi ka bym lah ban pynkhih, ngin sa kynjoh ia ka thong jong ngi ha kawei ka sngi.
U Conrad ula pyniapher ruh ïa ka rukom treikam u Dr Nonglait bad ka sain pyrthei na surok.
“Ki don katto katne ki seng sain pyrthei kiba ngeit ha ka sain pyrthei na surok, kiba ngeit ha ka jingpynkha ïa ki jingeh bad pynkha ïa ki jingkulmar….u Dr Nonglait u ieng kum ka nuksa ban pyni ba kum u nongshongshnong kane ka Ri….Ngan kynjoh ïa ka thong jong nga lyngba ka lynti ba jai jai, lyngba ka jingiakren bad lyngba ka lynti ka riti synshar” ong u Conrad.
Shuh shuh u Conrad u la ong “Nga ngeit shisha ba ka rukom pyniaid u Dr Nonglait ia ka jhad ka lam sha ka jingpynbna ia ka ktien Khasi bad Garo um ka Official Language ka Jylla, nga ngeit ba ki kam jong u ki dang dep tang shiteng….ka dei ka plan u Blei ba dei lyngba u Dr Nonglait ban gin lah ban pyntyllun shakhmat ia ki jingdawa jong ngi sha kawei pat ka sienjam ha Parliament…bad pynthikna ba ka ktien Khasi bad Garo kan rung noh ha ka thup jong ka Khyrnit ba Phra ka Riti Synshar ka Ri” ula ong.
Ha kajuh ka por u la kyntu ïa baroh ki Block jong ki 36 tylli ki constituency kiba don ha ri lum Khasi Jaintia ba kin ïa trei shitom bad trei borbah khnang ban pyntip ba u Dr. Nonglait un long u nongjop ha kane ka MP election ba shiteng samoi.
Nalor u Myntri Rangbah la ioh ruh ka jingkren na ki ar ngut ki Symbud Myntri Rangbah u Bah Sniawbhalang Dhar bad u Bah Prestone Tynsong.