Ka la don ka jingthmu ban pynduh ïa ki Dorbar Shnong ban bujli da ka Panchayati Raj: PN Syiem
Shillong K’lyngkot 07: U MDC ka Mawkhar -Pynthorumkhrah Constituency, u Bah Pynshngaiñ N Syiem, u la ong ba ka la don ka jingthmu ha ki por ba kham mynshuwa ban pynduhnoh ïa ka rukom synshar tynrai ka jaidbynriew ban bujli noh pat da ka rukom synshar Panchayati Raj khamtam ha ka por ba la wanrah ïa ka jingpynkylla ïa ka Riti Synshar ka ri lyngba ka 73th Amendment. hynrei u la ong ba dei da ka jingdon ka Khyrnit kaba hynriew bad ka jingsngewthuh u Myntri Rangbahduh barim ka ri u Rajiv Gandhi ba kine ki rukom synshar tynrai ki dang ïeng rasong haduh kine ki sngi kiba mynta.
Haba kren ha ka jingplie ïa ka ophis treikam jong ka Dorbar Shnong Mission Compound Shillong ha ka sngi Saitjaiñ, kaba u la pynmang na ka skhim MDC jong u ha ka jinglut kaba 8 lak tyngka u la ong ba ka jingdon jong ka dorbar shnong hi ka dei ka stieh kaba khrawtam jong ka jaidbynriew kaba ngi dei ban ïada ban ban pynbha shuh shuh ïa ka jingai jingshakri jong ka.
U la ong ruh ba ba kumba u Myntri Rangbahduh barim ka ri u Rajiv Gandhi uba ïeng ban kren na bynta ka sur ki riewlum ba dei ban pynneh beit ïa ka rukom synshar tynrai jong ki ym ban bujli salonsar kum ha ki rithor da ki Panchayati Raj, namarkata ka donkam ïa ngi ban pynkhlaiñ shuh shuh ïa ka jingtreikam kane ka rukom synshar kaba u menbarim u la ai pateng sha ki longdien ba mynta.
Haba ai jingkren ha kane ka sngi ,u Rangbah Shnong ka Mission Compound u Bah G.S Basan, u la ai khublei bad ka jingïaroh ïa u MDC u ba la trei shitom,h a kine ki 4 snem duna ban pynurlong ïa ka jingangnud ki shnong kiba la slem slem bah bad uba la ju ïatreilang ruh na ka por sha ka por bad ki Dorbar Shnong .
Ha kane ka sngi u Bah Pynshngaiñ u la khap ïa u ribon kum ka dak ka jingplie paidbah ïa ka ophis treikam jong ka Dorbar shnong ha ka jingïadonlang u Asistant Secretary ka shnong u Bah Lanangshngaiñ Pamthied, ki dkhot ka excutive committee jong ka shnong, ki longkmie, ki samla bad ruh ki nongshong shnong.
Ha kane ka sngi u Bah Pynshngaiñ u la plie paidbah ruh ïa ka Close Circuit Televisions (CCTV), ba kan long kum ka nongpeit pyrman ïa kam sniem bad ki kam bymman hapoh shong poh thaw.