Shillong, K’lyngkot, 07: Ka kynhun jong ki lai ngut ki Election Commissioner bad 13 ngut ki Ophisar jong ka Election Commission of India (ECI) kin sa wan iuhkjat ha nongbah Shillong ha ka 12 tarik mynta u bnai shwa ba ka Jylla Meghalaya kan sa leit sha ka elekshon jong ka Iingdorbar Thawaiñ ka ban sa long mynta u snem 2023.
Ka samoi treikam kaba san snem jong ka Ingdorbar Thawaiñ na ka bynta u snem 2018-2023 kan sa kut noh ha u Lber, 2023. Kane ka kynhun ba la khlieh da u Chief Election Commissioner u Rajiv Kumar kan sa leit iuhkjat shwa ha ka Jylla Tripura ha ka 11 tarik mynta u bnai ban ïakynduh ïa ki nongïalam jong ki seng saiñpyrthei, ki kynhun bapher bapher bad ïa ki ophisar jong ka tnat Elekshon ka Sorkar Jylla.
Kane ka jingwan iuhkjat jong kane ka kynhun kaba 16 ngut ka Election Commision of India (ECI) ka long ban pynkhreh ïa ki elekshon ki ban sa long ha ka Jylla Tripura, Meghalaya bad ha Nagaland mynta u snem.
Kane ka kynhun kan sa leit jurip ruh katto katne ki jaka ban bishar ïa ki jaka ba la pynlong ïa ka jingthep vote shwa ban wan iuhkjat sha kane ka nongbah Shillong ha ka 12 tarik mynta u bnai.
Katkum ka thymmei khubor, ka kynhun jong ka ECI la khmihlynti ba kan sa pynlong ïa ka jingïalang bad ki seng saiñpythei ha kane ka Jylla Meghalaya ha ka 13 tarik mynta u bnai bad ha ka 14 tarik mynta u bnai kane ka kynhun kan sa leit iuhkjat sa ha ka jylla Nagaland ban pynkhreh ïa ka jingïaid beit jong ka elekshon.
Ka thymmei khubor ka la ïathuh ba kane ka kynhun ynda la leit phai sha Delhi kan sa shong pyrkhat sani shwa ban pynbna ïa ka tarik elekshon na ka bynta ka jylla Tripura, Meghalaya bad Nagaland kiba la dei ka samoi ban pynlong ha u bnai ban sa wan.
Shuh shuh ka thymmei khubor ka ïathuh ba ka ECI ka la thmu ruh ban pynlong ïa ka elekshon hashwa ka taiew baar jong u bnai Rymphang, namarba ka CBSE ka ladep pynbna ïa ka eksamin na ka bynta ka Class-X bad Class-XII naduh ka 15 tarik, Rymphang, 2023.
