Khlem pat buh sngi ka KHADC halor ka jingthmu ban ai sanad ïa u Marremdor Sing Syiem

Shillong, Jymmang 07: U Chief Executive Member ka KHADC u Bah Winston Tony Lyngdoh u la khot ïa ka jingïakren bad ki nongïalam ka Hima Sohra ban ïakren halor ka jingdawa ka jong ki ban ai sanad ïa u Syiem ka Hima kaba ki la jied ïa u Bah Marremdor Syiem.
Ha kane ka jingïakren na ka liang jong ka Hima ka la sei ïa la ki nia ki jutang katkum ki riti ki dustur kiba ïadei bad ka jingjied ïa u Syiem kmie ka hima bad ha kajuh ka por na ka liang u CEM, u EM ba dei peit ïa ka Elaka, u Em ba dei peit ïa ka khyndew kiba la ïadonlang ha kane ka jingïakren kila ong ïa ki nongïalam ba mynta ka sngi kim pat lah ban ai ïa ka sanad bad kin sa ïa peit.
Ha kane ka jingïakren la mih ka kyrteng jong u Bah P. Syiem ba shong ba sah sha Mairang u ba la leit kam ba u ruh u don ïa ka hok ban ïakhun kam syiem ïa kane la pynpaw da u EM ba dei peit ïa ka tnad Elaka ha ka jingïakren bad ki nongïalam ka Hima Sohra ha kaba kum ka Hima kam don jingtip shaphang kata.
Ha kane ka jingïakren na ka liang ka Executive Committee ka la kren shai ba ïa mynta kin dang hap ban peit bniah haba ïadei bad kane ka kam hapoh ka Hima Sohra ïa ka jingdawa ban ai sanad kin sa dang ïa peit.
Na ka liang jong ka Hima kila kren shai ba ki la dep ban pyndep katkum ka riti ka dustur ha kaba jied ïa u syiem bad kaba sah mynta ki dawa ïa ka sanad ba ka District Council kan ai sha u syiem u ba ka hima kala jied ka hima kam ithuh ithuh ïa u P. Syiem u ba ka Executive Committee ka pynpaw ha kane ka jingïakynduh.