Nongpoh, Naitung 16: Ka Special Intensive Revision (SIR) jong ka Electoral Roll ka dang ïaid shakhmat ha Ri-Bhoi District hapoh ka jingïalam jong u District Election Officer (DEO), Ri-Bhoi District, ha kaba ka ophis ka dang pynkhlaiñ ka jingtreikam ban pynthikna ba baroh ki nongthep vote kiba dei hok kin ïashim bynta ha kane ka jingpynbeit thymmai ïa ka Electoral Roll.
Katkum ka jingïoh lum jingtip, haduh ka 15 tarik Naitung 2026, la dep ban sam haduh 1,95,495 tylli ki Enumeration Forms (EFs) ha ka district baroh kawei, kaba long 95% naki nongthep vote baroh bad kumba 69,849 tylli ki Enumeration Forms la dep ruh ban digitise, kaba long 34% naki nongthep vote baroh.
Ka jingïaid shaphrang ha ki constituency bapher bapher ha Ri-Bhoi District ki kynthup ïaka 8-Mawhati AC kaba la poi haduh 98.5%, 9-Nongpoh AC- 97.6%, 10-Jirang AC- 92.3%, 11-Umsning AC- 95.5%, 12-Umroi AC- 90.8%
Ban pynkhlaiñ ïa ka jingtip ki paidbah, u District Election Officer u la pynlong ïa ka jingïalang ha ka 15 tarik Naitung bad ki Nodal Officers jong ki Electoral Literacy Clubs (ELCs) na ki skul bad kolej, ryngkat bad ki dkhot jong ka Bike Riders Association.
Naka liang ki Electoral Literacy Clubs kin pynlong ïa bun jait ki prokram pynsngewthuh paidbah kum ki Student Rally, Street Play, Flash Mob bad kiwei pat ki prokram ban pynshai halor ka jingdonkam jong ka Special Intensive Revision (SIR) bad ban pynshlur ïa ki nongthep vote ban pyndep ïa ki Enumeration Forms.
Kum shi bynta jong katei ka jingïalap, yn pynlong ruh ïa ka Bike Rally ha ka 22 tarik Naitung 2026, kaban ïaid lyngba ki shnong kiba kongsan jong ka district kynthup ïaka Byrnihat, Nongpoh, Umsning bad Bhoirymbong, ban pynsngewthuh paidbah halor ka SIR bad ka hok ban thep vote.
Hadien kane, u District Election Officer u la pynlong ruh ïa ka jingïalang bad ki nongmihkhmat jong baroh ki seng saiñ pyrthei ha Ri-Bhoi District ban bishar ïa ka jingïaid shaphrang jong ka Special Intensive Revision bad la ïakren ruh halor kino kino ki jingeh kiba mih ha ka jingpyntreikam ïaka SIR bad ruh ban pynthikna ba yn lah ban digitise 100% ïa baroh ki Enumeration Forms shuwa ban kut ka por ba la buh na ka bynta ka Special Intensive Revision.
Naka liang u District Election Officer u la kyrpad ïa baroh ki nongthep vote kiba dei hok ba kin ïatreilang bad ki Booth Level Officers (BLOs) bad ban pyndep bad aiti noh ïa ki Enumeration Forms hapoh ka por ba la buh.
Ki paidbah kiba donkam jingïarap ne jingshai shaphang ka Special Intensive Revision (SIR) ki lah ban phone sha ka SIR Help Desk ha u number 9863985792.
