Nongpoh, Naitung 16: 3 ngut ki briew kila mynsaw ha kawei ka jingjia aksiden kaba la jia hynne ka step hadien ba kawei ka kali Fronx kaba la kynnoh pynher sted kala leit ban tynrah ïa kawei ka auto rickshaw ha surok bah National Highway-6 haka shnong Mawdiangum.
Katkum ka jingtip bala ioh lum la ong ba kane ka jingjia kala jia haka por kumba 9 baje eiei mynstep ha kaba katei ka kali Fronx kaba dang hiar sha ki thaiñ Guwahati ka bym pat don number kala pynher sted shaba palat haduh ba u nongñiah um lah shuh ban tehlakam bad leit tynrah ïa kawei ka auto rickshaw kaba don ïa u number ML 10 C 6619 haduh ba lai ngut ki briew kiba shong ha katei ka auto kynthup ïa u nongñiah kila mynsaw ha katei ka jingjia bad baroh ar tylli ki kali kila julor.
Shuh shuh la ong ruh ba u nongñiah katei ka kali Fronx u la pyrshang ban phet krad na katei ka jaka hynrei u khlem lah shuh namar ka taiar khmat jong ka kali kala pait.
Naka liang ki pulit ka Nongpoh Traffic Police mar mar kila leit sha katei ka jaka ban pynlong ka jingtohkit bad ruh ban leh katkum ki kyndon jong ka aiñ, katba ïa kitei kiba mynsaw la pynkit noh sha Nongpoh Civil Hospital ban ioh ka jingsumar.
