Kop u ma Wailadmiki yn thaw sorkar ka NPP ha u 2023, yn jop 18 ngut na Khasi-Jaiñtia bad 15 na Garo

0

Jowai, Risaw 06: U MLA ka 2-Jowai Constituency ma Wailadmiki Shylla uba dei ruh u District President ka National People Party (NPP) hapoh ka West Jaiñtia Hills District ula kam ba NPP ha kane ka Election 2023 kan ïoh ban thaw marwei ïa sorkar. Ïa kane ula pynsngew katkum ka jinglum jingkheiñ haduh mynta la tikna 18 ngut ki candidates na ka Khasi bad Jaintia kin jop beit ïa ka Election 2023 bad 15 gnut na Garo Hills lada kheiñ baroh kan long 33 ngut baroh bad ka sorkar kan dei beit happoh ka jingïalam ka NPP ong ma Wailad ha ka jingkren pynskhem ïa ki nongkitkam ba wan pynïasoh thymmai ha Amlarem.
U ma Wailad ula pynsngew ruh halor ki kam jong kane ka sorkar MDA ba mynta kala la pyrshang ban trei naduh ka kam pynbeit ïa u pud u sam hapdeng ka jylla Assam bad Meghalaya ha ki 12 tylli ki jaka ba ïa khajia na ka por sha ka por, kumjuh ruh halor ka kam ban pynjlan ïa ka rta thungkam sorkar bad ka issue jong ka them mator.
Ha kane ka sngi u khot ka jingïatreilang jong baroh da kaba kyntu ïa ki paid ka 7-Amlarem ba kin ai ka jingkyrshan ïa ka party da kaba u ong ba kane ka sorkar ka ban wan kan long beit ha ka jingïalam ka NPP bad kan long kaba suk ïa ki paidbah ban ïadei kam.
Ula kren shaphang ka jingïatreilang hapdeng ki Candidates bad ki Leaders da kaba u pynsngew ki jingeh kiba lah ban mih hapdeng jong ki, man ka por kum ki Candidates ki banse bad kloi ban leit jurip mar mar sha ki ïing bad ki jaka sumar ba don ki Leader wat ha ka por mynmiet ruh lada ki pang ki shitom namar ïoh tieng lada ym leit u Leader un phet noh u kyrtong, kumta u buh ka jingkyntu ba ym dei ban don ka jingïapher jingmut hynrei ki dei ban ïatylli lang ha kano kano ka kam.
Ha ka juh ka por u ai ka jingïaroh ïa u ma Stephanson Mukhim uba don ïa ka mynsiem sngewrit wat lada u long kum u MLA bad wat hadien ka jingshah rem ha u snem 2018 u kloi ban ai jingïarap ïa kiba donkam, halor kane ka jinglong jong u na ka liang ka Party ruh kala kloi ban ai ka jingkyrshah tylli pura ha u ma Mukhim ha kane ka kynti ong u ma Wailad.

Leave A Reply

Your email address will not be published.