5177 hajar tylli ki longïing ha ki 46 tylli ki shnong ka SWKH kin ïoh umbam na ka skhim JJM, buh mawnongrim u Myntri ka tnad PHE

0

Mawkyrwat, Risaw, 07: U bah Renikton Lyngdoh Tongkhar, Myntri ka tnad Umbam Umdih jong ka Jylla Meghalaya uba long kum u kongsan mynta ka sngi u la ïoh ban plie paidbah ïa ki mawnongrim jong ki 11 tylli ki skhim um kaba la kot ha ka jingmang pisa kaba T. 112.21 klur tyngka ha phyllaw jong ka ophis jong u Executive Engineer ka PHE, Mawkyrwat Division, South West Khasi Hills District.
Haba kren ha kane ka jingïalang u bah Renikton Tongkhar u la pynpaw ïa ka jingsngewkmen ban ïoh buh mawnongrim ïa kine ki 11 tylli ki skhim kata ba ki 9 tylli ki ïaid lyngba ka Jal Jeevan Mission (JJM), kawei ka Rural Infra-structure Develop-ment Fund (RIDF) bad kawei pat ka Minimum Need Programme (MNP) ha kaba ka jingmang pisa ka long T. 112.21 klur bad kane ka skhim kan kynthup ïa ki 46 shnong bad ka ban bsa um ïa kumba 5177 tylli ki longïing bad da kaba kyrmen ba kine ki skhim kin sa long ka jingkyrkhu ïa ka dong ka thaiñ.
U la ïathuh ruh ba ha shwa jong kane ka Jal Jeevan Mission (JJM) la ïoh kumba 46 tylli ki skhim kiba la mang kumba T. 41.76 lak bad kiba la nang ïaid shakhmat ha ka jingpyntrei bad kiwei pat ki skhim kiba la nangtrei bad ban khot tender hangne ha Mawkyrwat ka la poi sha ka T. 150 klur tam ei ei. Ha kajuh ka por u la buh ka jingkyrpad ha khmat ki npongpyntrei ne ki contractor ba kin sa shim ïa ki kam katkum ka jinglah jong ki ban pyndep katkum ka por kaba la buh bad u khmih lynti ban ïoh ban pyndep bun tylli ki ïing la kumno kumno hapoh u bnai Nohprah wat lada yn ym lah ban pyndep lut namar ka jingmih jong kiba bun ki longïng kiba thymmai.
Ha kajuh ka por ula ïaroh ïa ka PHE Department kaba la trei shitom khlem jingkhñium bad dei lyngba ka jingtrei shitom jong ki ba la lah ban pyntreikam bha ïa ka Jal Jeevan Mission bad pynïoh ruh ïa ka ‘Presidential Award’ ha ka 02 tarik u Risaw, 2022. Namarkata, u la wer ïa ka jingïatreilang jong ki paidbah da kaba shimkhia ïa ka jingdonkam bad ka jingkordor jong ka um ba kan ym don kano kano ka jingpynthut ha ka jingpyntreikam bad pynurlong ïa kane ka jingthmu jong ka Jal Jeevan Mission ka ban pynlyngngoh ïa u paidbah uba khlem phohsniew ne khmih lynti ba ka um kan poi haduh ïing.
U la pynpaw ka jingsngewnguh ïa ka sorkar kaba la shimkhia ha ka ban ïoh ban pyntreikam ïa kane ka skhim khamtam ha ki jaka nongkyndong ka ban pynmyntoi ïa u paidbah. U la wer ïa ka jingïatreilang bad u ong ba ka jingjop jong kano kano ka skhim kam kut tang ha kaba ïoh tang ki jingman hynrei dei lyngba ka jingïasnohkti lang jong u paidbah da kaba kyntu ruh ïa ka Village Water Supply Committee (VWSC) ban shimkhia ha ka ban peit ba kine ki skhim kin treikam lynter ym ba kin shu treikam tang katto katne por. Shuh shuh ula ïathuh ba ki don ki katto katne ki skhim kiba sahteng bad kiba hap ban pynbeit bad ban hap ban pynïaid lyngba kiwei pat ki skhim bad u khmih lynti ba shen yn lah ban ai ka jingmang na ka bynta kitei kiba sah teng.
La ban kdew ba ki kam pynroi ba la buh mawnongrim mynta ka sngi ki long ha ka Jal Jeevan Mission (JJM) ki don 9 tylli kata ka Greater Water Combine Water Supply Scheme ki don 8 tylli ki shnong, ha ka Mawrangranglang Combine Water Supply Scheme ki don 5 tylli ki shnong, ha ka Aug of Laitnong Combine Water Supply Scheme ki don 5 shnong, ha ka Pyndenkseh Combine Water Supply Scheme ki don 5 shnong, ha ka Mawthong Combine Water Supply Scheme ki don 2 shnong, ha ka Umsaitshriew Combine Water Supply Scheme ki don 5 shnong, ha ka Pawphlang Combine Water Supply Scheme ki don 6 shnong, ha ka Domjajiew Combine Water Supply Scheme ki don 5 shnong, ha ka Shaid Shaid Umoid Combine Water Supply Scheme kawei ka shnong, ha ka Sakwang Combine Water Supply Scheme ki don 3 shnong, ha ka Rangdikhiew Combine Water Supply Scheme kawei shnong.
Ha kane ka sngi la ïadonlang naduh ki ophisar jong ka distrik kata naduh u bah L. Tariang, MSC, Additional Deputy Commissioner, South West Khasi Hills District, ka Deputy Superintendent jong ki Pulit (Crime), P.W. Sangma, u SDO ka PHE Mawkyrwat, bah R. Nongdhar, ki Myntri jong ki shnong, lem bad kiwei de. Kiwei pat ki nongkren ha kane ka sngi ki long u bah D. Marbaniang, Additional Chief Engineer, PHE Zone – III, Shillong, u bah S. Kharjahrin, Myntri Shnong Sakwang, bad u bah P. Wanniang, Myntri Shnong Sohkhyllam.
La pynshit pynshngaiñ ïa kane ka sngi da ka jingrwai kyrpang na ka samla Lapynhunshisha Sohphoh, na ka samla Lapdiang Nongsiej bad ka jingshad na ka Maram Folk Academy. Kham shwa ïa ka jingïalang bad jingkren pdiang sngewbha la ïoh na u bah S. Najiar, Executive Engineer ka PHE, Mawkyrwat Division bad ka jingkhublei na u bah R. Nongdkhar, SDO ka PHE Mawkyrwat Division.

Leave A Reply

Your email address will not be published.