Plie pyrda u Bah L.T. Tariang ïa ka lympung ïalehkai Third bad Second Division ha madan Artificial Turf

0

Mawkyrwat, Risaw, 07: Ka Mawkyrwat District Sports Association (MDSA) mynta ka sngi ka la ïoh ba plie pyrda ïa ka lympung ïalehkai kynjatbol jong ki ar tylli ki jingïalehkai kata ka Third bad Second Division ha madan Artificial Turf, MDSA, Mawkyrwat, South West Khasi Hills District ha kaba u bah L.T. Tariang, MSC, ADC, South West Khasi Hills District u la long kum u kongsan.
Ha ka jingïalehkai sdang jong kane ka lympung la pynïalehkai nyngkong kaba dei jong ka Third Division hapdeng ka Samla Sports Club Domruah pyrshah ïa ka Mawpyllun Youths Club, Mawten, ha kaba ka Maw pyllun Youths Club, Mawten ka la jop noh da 4 – 1 kol. Ïa ki kol jong ka Mawpyllun Youths Club la ïoh ban thep da u Mebanlang Lyngdoh Rngaid ha ka minit kaba 14, na u Sevenson Marweiñ ha ka minit kaba 18, na u Stephanjone Lyngdoh ha ka minit kaba 23 bad na u Aiborlang Marngar ha ka minit kaba 47. Nangta, ka Hor Spring Sports Club ka la jop ïa ka Rangblang Soh-synñiang PC&CC da 1 – 0 kol ba la thep da u Everwel Kharsyiemiong ha ka minit kaba 49.
Ha ka Second Division pat ka Mawkyrwat Sports Association ka la jop noh da 5 – 3 kol pyrshah ïa ka Diriang Football Club bad ka Photjaud-Rangthong Sports Club ka la jop pyrshah ïa ka Thieddiengngan Sports & Cultural Club da 3 – 0 kol.
Ïa katei ka lympung ïalehkai kynjatbol la plie pyrda da u bah L.T. Tariang, MSC, ADC, South West Khasi Hills District bad haba bynrap ïa ka jingkren u la pynpaw ka jingaikhublei na ka bynta baroh ki kynhun kiba la mih sha madan ban ïa aireng ha kane ka lympung ïalehkai kynjatbol kaba long da shisha ka lympung ha kaba baroh ki briew jong kane ka dong ka thaiñ ki ieit bad ki ju sngewtynnad ban wan sakhi. U la ong ruh ba ka jingïalehkai ka dei kawei na ki bynta ban pyllait ïa ki briew na ki jingmlien ba sniew kum u drok bad ka kyiad kiba long ki jingbam kiba pynsniew ïa ka met jong ki nongpyndonkam.
U la ong ruh ba kum ki khun samla jong ka dong ka thaiñ ba ki dei ban pyn-donkam hok ïa kata ka sap ba ki ki don khnang ba kin nang kiew ha ki kyrdan kiba kham hajrong bad ym tang ba kin kut tang hapoh jong ka distrik la jong hynrei ba kin ïoh ban mihkhmat ruh sha kiwei de ki distrik. Namarkata, u la pynpaw ka jingaikhublei na ka bynta ka sorkar lyngba ka tnad ki kam ïalehkai bad kumjuh ruh ki association ne ki sports club kiba ju pynlong ïa ki jait jingïalehkai bapher bapher da kaba thmu ban kyntiew ïa ki samla ha kane ka bynta. Ha kajuh ka por u la ong ruh ba ba balei ka jaidbynriew jong ngi ka nang ban ujor, hynrei kaba donkam ka long ba kin trei shitom bad kyntiew iwei ïa iwei pat.
Haba kren ai mynsiem na ka bynta ki ‘rangïalehkai, u bah Tariang ula ong ba kum ki nongïalehkai ki dei ban don ka mynsiem bad jingmut jingpyrkhat kaba khuid, ki dei ban don ruh ka jingkut jingmut ryngkat ka jingtrei shitom khnang ba kin poi sha ka thong jong ka jingjop.
Ha kane ka sngi ki long u District Sports Officer (DSO) jong ka South West Khasi Hills District, bah Damang Synkon, u General Secre-tary ka Mawkyrwat District Sports Asso-ciation (MDSA), bah P. Wanniang, lem bad kiwei de ki nongkitkam ka MDSA ryngkat ruh ki nongwan peit kai.

Leave A Reply

Your email address will not be published.