73 hajar tam u synñiang ki paidbah aiti ka Sur ki Nong West sha u Bah Hubert Paliar

0

Nongstoiñ, Risaw, 7: Ha ka sngi thohdieng jong ka taiew, ki nongïalam jong ka sur u Nongwest, ki la lah ban aiti noh ïa ka 73,230 tyngka, ka noh synñiang jong ki paidbah West Khasi Hills ïa u samla rangbah u Hubert Paliar, u samla ban sa mih noh ha ka 12 tarik na ka Jylla sha ka International Arm Wrestling ka ban long ha ri Turkey.
Ïa kane ka song tyngka la aiti hynne ka sngi sha u Hubert Paliar da ki nongïalam ka sur u nongwest, ha ka jingïalang kaba lyngkot kaba la long ha ophis treikam jong ka sur u nongwest kaba don ha Nongstoiñ.
Ha ryngkat ka jingdonlang kiba haïing hasem lem bad ki nongthoh khubor, la pynlong ruh ïa ka jingïalang kaba lyngkot bad hadien la plied pat ïa ki lai tylli ki synduk thep pisa. Hadien ba la plied, la ñiew ïa ki bin pa bin bad katkum kitei ki synduk, ka pisa baroh ka long 73,230 tyngka.
Na ka liang ki nongïalam ka synjuk ki la aiti ïa katei ka pisa bad la pynlong ruh ka jingdwai. Nalor nangta ki la pynpaw ka jingkyntu sha kito baroh ki bym shym pat la noh ba kin ïarap bad ïakynduh kyrpang ïa u Hubert Paliar, namar ha ka 12 tarik mynta u bnai un mih na ka Jylla.
Kumjuh ruh, ki la pynpaw ïa ki kyntien kyrkhu kyrdoh bad kitbok kit rwiang ïa une u samla rangbah ba un ïoh ïa ka met kaba koit kaba khiah bad ba un poi sha ka thong. Kumjuh ruh ki la pynpaw ka jingkhublei sha kito baroh kiba la noh na ka bynta une u samla pawnam jong ka thaiñ, namar u donkam shisha ïa ka jingïarap na baroh kiba don mynsiem.
Hadien kane la ïoh ruh ka jingkren khublei na u samla Hubert Paliar u ba la shu batai da ki kti bad ba la pynshai pat da I kurim jong u sha kito kiba ïoh sngew. Na ka liang u samla Hubert u la ai khublei ïa ki nongïalam ka sur Nongwest na ka bynta kane ka mynsiem ba ki don. U la ai khublei ruh sha baroh kiba la noh synñiang bad u la kyrpad ruh sha baroh ban buh lem ha ki jingduwai.

Leave A Reply

Your email address will not be published.