Shillong, Naitung 31 : Ka Hynniewtrep National Youth Front (HNYF) mynta ka Sngi Lah U Blei ka la pynpaw ba ka kloi ban ïarap ïa baroh kito kiba ïoh pdiang ïa ki shithi dawa pisa ha ka kyrteng jongka seng Hynniewtrep National Liberation Council (HNLC).
“ Ngi kyrpad ïa kito baroh kiba ïoh pdiang ïa ki shithi dawa pisa ha kyrteng ka seng HNLC ba kin wan mih sha ophis ka seng HNYF namar ka seng ka kloi ban ïarap ïa ki ym ba kin leit sha ki lad pathai khubor khlem da pyntip bniah pat shaphang jongki namar ka long kaba eh ban tip bad pynshisha” ong u President ka HNYF East Khasi Hills District u bah Bless Dkhar.
Kane ka jingpathai khubor jongu mynta ka sngi ka la jia hadien shisngi ba kawei na ki longkmie ba kamai rit ka la phah ïa ka shithi sha u lyngba ka email bad sha kawei na ki kot khubor khasi ruh ba ka la ïoh pdiang ïa ka shithi dawa pisa haduh 20 lak tyngka na u Synshar Khymdeit uba kam ba u dei u u nonglum pisa ne collector ka seng HNLC na ka bynta ka East Khasi Hills bad ka Ri Bhoi District.
U bah Dkhar u la ong ba ula dap da ka jngkyndit haba u la ïohi ïa kane ka shithi ba la phah sha u da kawei ka longkmie kaba bym lah ban ithuh kaba la shu ïathuh ba ka dei kaba sah ha Mawlai bad kaba la phla ba ka la siew ruh khyndiat ka pisa sha u Khymdeit namar ka dap da ka jingsheptieng.
U la ong ba ka seng HNLC dang shen ka la pynshai kdar ba kam don kti ei ei ruh ha kaba ïadei bad kane ka kam dawa pisa namar ba ka jingkren ïasuk hapdeng ka Seng, ka sorkar pdeng bad sorkar jylla ka dang ïaid shakhmat.
Une u nongïalam ka HNYF u la suba jur ba ki lah ban dei ki ‘langiong’ ha lyndet kane ka jingphah ïa kine ki shithi dawa pisa ha kyrteng ka seng HNLC da ka jigthmu ban pynthut ïa ka jingkren ïasuk hynrei na ka liang ka HNYF ka la rai ban ïai bud dien ïa kane ka kam.
“ Ha kajuh ka por ngi ai ka jingmaham kaba tyngeh ïa u Synshar Khymdeit bad ngin ïai bud dien ban lap u dei uei. Ngi kyrpad ruh ïa ki paidbah ban wan shakhmat namar ka HNYF ka kloi ban ïarap tangba kan long halor ka nongrim ba kin a kynduh ïa ngi markhmat. Ngi maham jur ruh ïa kito baroh kiba pyndonkam bakla ïa ka kyrteng ka seng HNLC ba lada jia ei ei ïa ki ngin ym don kano kano ruh ka jingkitkhlieh” ong u bah Dkhar.
Nalor kane u la kyntu ruh ïa kito kiba ïoh pdiang ia ki shithi dawa pisa ba kin ujor da ka ejahar khnang ba ki pulit kin bud dien bad thwet ïa ki briew ba donkti bad pynngat ïa ki ha ki kyndon aiñ.
