Mynjur ka Bangladesh ban tei ïa u maw mot dur ba shirynïeng jong u Tirot Sing Syiem ha Dhaka
Pyntip u High Commissioner ka India sha u bah Paul Lyngdoh

Shillong, Naitung 31 : ïa u maw mot dur ba shirynieng jong u Khlawait ka jaidbyriew u Tirot Sing Syiem yn sa tei ha ka Indira Gandhi Cultural Centre (IGCC) ha Dhaka, Bangladesh.
Haba pyntip ïa kane na Delhli lyngba ka Video Conference mynta ka Lah Sngi U Blei u Myntri ka tnad Art and Culture u bah Paul Lyngdoh u la ïathuh ba u High Comissioner jongka India sha Bangladesh u Pranay Verma u la phah shithi bad pyntip ïa u ba ki ar ri kata ka India bad Bangladesh ki la mynjur ïa ka jingtyrwa jongka sorkar Meghalaya ban tei sah kynmaw ïa u maw mot dur jong u Tirot Sing Syiem u nongïaleh laitluid bad Khlawait jongka jaidbynriew uba ïeng ban ïaleh thma pyrshah ïa ka sorkar Phareng bad iap ha phatok ha Dhaka.
U Verma u la pyntip ba ka High Commission jongka India ha Dhaka ki la bud dien ïa kane ka jingtyrwa ka sorkar Meghalaya bad ka tnad External Affairs bad ka ICCR bad la mynjur ban tei ha ka IGCC Dhakha.
Kum shi bynta ka jingrakhe ïaka Azadi Ka Amrit Mohotsav ha Bangladesh, ka Libarary jongka IGCC kaba don ha Dhanmondi kan long ka jaka ba biang eh ban tei ïa une u maw mot dur ba shirynïeng jong u Tirot Sing Syiem, ong u Verma.
U bah Paul u la ong ba u High Commissioner ka India sha Bangladesh u la ai jingmut shuh shuh ba ïa kane ka Library ruh la dei ban jer kyrteng noh kum ka Tirot Singh Memorial Library ban dang ïai pynneh pynsah ïa ka nam bad burom jong une u khlawait uba ïakhun thma pyrshah ïa ki shipai ka sorkar Phareng pateng la pateng.
U bah Paul u la ïathuh ba ka sorkar jylla kan sa ïakren bad ka Director IGCC ha Dhaka ban pynbit pynbiang ïa ki dur ki dar ban sdang ïa ka jingtei.Hadien ba la dep tei yn sa pynlong da ka jingïalang plie ban ïadon lang ki heh na ka sorkar jylla, sorkar pdeng bad sorkar Bangladesh.
“ Ngi buh thong ban pyndep ïa kane ka jingtei hapoh u Naiwieng ne Nohprah mynta u snem” ong u bah Paul.
Shuh shuh u bah Paul u la ong ba ka sorkar kan pan ka jingïarap na u riewkhraw jabieng u Prof David Syiemlieh ban pynbiang ïa ki kot ki sla jong u Tirot Singh Syiem kata ban tip naduh ka tarik ba la kem ïa u, ka tarik ba u khlad na London khnang ban ïoh buh jingkynmaw ha IGCC Library.
U la ong kane ka jingïoh ban tei ïa une u maw mot dur bad lehse lada ïoh sa kata ka Library ha kyrteng une u khlawait ha Bangladesh kan long ka nam bad burom bad ka jingjop kaba khraw bad sah kynmaw ïa ka jylla Meghalaya.