Ryngkat ki dulir naduh ki snem 1951, leit pyni ki paidbah na Block II ha KHADC
‘Ngi dei ki Khasi,ngi kwah ban don ha Meghalaya’
Shillong, Naitung 31 : Ki nongshong shnong na Block II ryngkat ki Rangbah Shnong hapoh ka jingïalam jong ka CORP hynne ka sngi ki la leit ban kynduh ïa u Deputy Chief Executive Member ka KHADC, Bah PN Syiem ban pynpaw ba kum ki Khasi ki kwah ban don sha u pud u sam jong ka Meghalaya.
Ha kane ka sngi, katei ka kynhun ka la rah ruh bad ki dulir kiba dei naduh ki snem 1951 ter ter ban pyni ha ki bor synshar jong ka Council.
“Ïa kine ki dulir jaka ngi la ïoh naduh ka por ba ka thain ka dang hap ha ka Sub Division Jowai,” ong ka Kong S Myrsing, kawei na ki longkmie haba kren bad ki lad pathai khubor hadien ba ki la dep ban kynduh ïa u Deputy CEM.
Shuh shuh la ïathuh ruh ba tang ha Ummat, Block II kaba hap ha ka Raid Nongtung ki la don haduh kumba 300 ngut ki trai jaka kiba pynpaw ba ki kwah ban don beit sha Meghalaya.
“Ïa ki kam pynroi ngi ïoh na Meghalaya hynrei ka khyndew pat kam hap satia. Kawei ruh lada ngi ha sha katei kawei ka jylal kan buh jingeh shibun ïangi namar ngim sngewthuh ka ktien ka thylliej ban ïa kren bad ki kam ban trei,” ka la ong da kaba bynrap ba khlem ka khyndew ym don nongrim satia ban ieng kjat ha kito ki jaka.
Nalorkata, katei ka longkmie ka la ong ruh ba na bynta jong ka marwei hi, kam sngew ei ei wat ban duh ei katto katne ka jaka puta tang ban pyntikna ba kin ngat noh sha Meghalaya bad ruh ban ïoh pynbeit noh ïa u pud u sam.
Haba bynrap lang, u President ka CORP, Bah Bandari Ryntathiang u la ïathuh ba ha ka jingkynduh bad u Deputy CEM ki la ïakren bun kiei kiei kiba ïadei bad katei ka bynta khamtam haba ki paidbah na katei ka jaka ki thrang ban hap noh sha Meghalaya.
Na ka liang u Deputy CEM pat u la ïathuh ba kan bha shibun ba kitei ki nongshong shnong kin tylli lang kawei ka sur bad kin pynpaw ruh ha ka Regional Committee ha ka por ba katei ka kynhun ka wan.
Lah ban kdew hangne, ka jingïakren pynbeit pud ha ka kylla kaba ar hapdeng ka Meghalaya bad Assam kan sa long shen mynta u bnai hi bad ka Block II ka dei kawei na ki thaiñ kaban don lang ha kane ka thup.