Shillong, Jymmang 23 : Ka Meghalaya Pradesh Congress Committee (MPCC) ha ka sngi Nyngkong ka la pynpaw ba ki long kiba kloi ban weng noh ïa ka rai sospon ïa ki san ngut ki MLA jong ka lada ki kloi ban weng noh ïa ka jingkyrshan ïa ka sorkar synrop ba ïalam da ka NPP bad UDP.
Haba kren bad ki lad pathai khubor, u Working President ka MPCC, Bah PN Syiem u la ong, “Ka shong ha ka jingsngew jong ki MLA ba shah sospon, lada ki weng noh ïa ka jingkyrshan ïa kane ka sorkar kam don jingeh ban weng noh ïa ka jingsospon. Bad haba la weng ïa ka jingsospon ki lah ban ïakhun na ka tiket Congress ha ka elekshon MLA ha u 2023.”
Tangba, u ong pat ba lada kim weng ïa ka jingkyrshan ïa ka sorkar jylla, ka jingkren ban weng ïa ka jingsospon ïa ki ruh ka kham eh.
Haba kren pat halor ka jingmih ki khubor ba bun ki MLA Congress kiba la kynthih shawei pat ba ki pyrshang ban leit pan tiket na kiwei pat ki party, utei u heh Congress u la ong, “Ym dei tang kitei bapli, hynrei kiba mih hakhmat kham ha shwa ruh ki la babe, kata ka jingshisha. Phi ruh phi ïohsngew hi ba bun ki leit pan tiket kum na ka UDP bad na kiwei pat ki party.”
Shuh shuh u la ong ruh ba um sngew lah ngeit ïa ki khubor ba kitei ki MLA ba phet na ka Congress ba kin leit pan tiket na ka Aam Aadmi Party na bynta ba kin ïoh ban aireng ha ka elekshon ban wan. U ong ruh ba lada phai sha ka Congress ka shim por da ki phew snem ba ki paidbah kin pdiang ïa ka bad kumta katno tam kan shimpor ïa katei ka party ha kane ka jylla.
“Kam dei kaba suk ïa ki ruh namar ïoh ki babe kumba ki babe mynta ba ki mih na ka party Congress,” u la bynrap shuh shuh.
Kumban shu kdew hangne, ki don haduh 12 ngut ki MLA kiba phet na ka Congress ban leit ïasoh sha ka TMC bad hadien kane pat sa san ngut kiwei pat ki la leit ban kyrshan ïa ka sorkar MDA ba ïalam da ka NPP. Kumba long mynta hi, ka Congress watla ka don haduh 17 ngut ki MLA pynban mynta ym don shuh iwei ruh ha ka party namar kitei ki san ngut ki don mynta ha ka jingshah sospon.
