Ki la lute lut ïa ka jylla, kim donhok shuh ban synshar

Shillong, Jymmang 23: U Zenith Sangma, MLA ka Seng All India Trinamool Congress, u la ther tyngeh ïa ka sorkar MDA, da kaba kynnoh ba ki la lute lute ïa ka jylla bad kim donhok shuh ban synshar ïa ka jylla.
Ha ka kyrwoh ba u la phah mynta ka sngi, u Zenith, u la ong ba kane ka sorkar jong u Conrad Sangma kam don hok ban don ha ka bor synshar, namar ka don tang ka sorkar katba ka jingsynshar pat kam don. “Naduh u snem 2019, nga la kdew bad pyni ïa kane ka jinglute jong ki, hynrei borabor ki kyntait beit”, la ong u nongïalam ka Seng AITC.
Haba kdew ïa ka jingjia ba khatduh ban jia ha kane ka sorkar ba mynta, kata ka jingkhyllem ka bynta ba pdeng ba long tnum pyllun jong ka jingtei ïa ka ïingdorbar thawaiñ ka jylla, u Sangma, u la ong ba ka don ka jingjot kaba dei ban shah pynshitom. U la ong ruh kaei kaban jia lada baroh ki MLA ki shong ha katei ka ïingdorbar lane kaei kaban jia lada ka jia ha ka por mynsngi.
Haba ther shuh shuh halor kane ka jingjia, u Zenith, u la ong ba kine kidei ki dak ki shin ne ki jingpynshisha ba ka don ka jingbamsap kaba ym lah shuh ban kyntait da kumno kumno ruh. “Kane ka pyni haduh katno ka jingbamsap ka la ngam ha ka jingmut jingpyrkhat jong kiba don ha ka bor haduh ba kim pyrkhat shuh ïa ka jingim briew”, la ong u MLA barim ka Seng Congress. Namarkata ka daw u la ong ba dei ban phah tohkit bad pynshitom ïa kito kiba donkti.
Ha kajuh ka por u Sangma, u la khyrwit ruh ïa ka jingdkoh treikam ka MeECL, kaba la shu buh da ki nongtrei ki bym ler, ha kaba na ka por sha ka por ki briew ki shah bat ne shah lympat ha ka bor ding elektrik. U Zenith, u la ong ba dang hynnin ka sngi, uwei u briew u la ïap na ka jingshah bat bording elektrik ha Rerapara, kaba ka lok bad ki khun jong u, ki la shu duh ei ïa u nongbsa bad u nongpyndap ïa ka ïing ka sem.