Shillong, Risaw 21 : U President ka Meghalaya Pradesh Congress Committee (MPCC), Bah Vincent H Pala u la pynpaw ba u long uba kloi ban pdiang sngewbha ïa u Myntri Rangbah barim ka Jylla, Dr. Mukul Sangma ban wanphai biang sha ka party.
“Ym tang ïa u Dr. Mukul Sangma, ngi pdiang sngewbha ruh ïa baroh kiba la phet noh na ka party namar ka party hi kam dei tang jong u Bah Pala, hynrei ka party kadei jong baroh,” ong u Bah Pala haba kren bad ki lad pathai khubor.
“Na ka liang ka Deborah Marak, Working President jong ka MPCC ka la ïathuh ïanga ba ka long kaba kloi ban khot biang ïa u Dr. Mukul sha ka Congress. Kumta nga la ong ïa ka ban ïaid shakhmat ïa ka kam. Hynrei lada jia ba u Dr. Mukul Sangma lane kino kino ki nongïalam ki kwah ban wan pynïasoh biang sha ka party, ngi hap ban phah pat sha Delhi bad nangtei kan sa ai ïa ka jingmynjur,” u la bynrap biang.
Nalorkata, u Bah Pala u la ong ruh ba kin sa rai mano kiban pynïasoh sha ka party. “Ngin sa rai mano kiban pynïasoh sha ka party kumta ngam tharai ba ngin don jingeh lada mano mano ki wan pynïasoh la ka long naduh u Dr. Mukul Sangma lane kino kino. Ka party kadei tang ka rynsan bad baroh ki don ka hok ban wan pynïasoh bad baroh ki don ïa ka lad ban wan.”
Shuh shuh utei u heh Congress u la kam ruh ba ka party ka la dei ban ïoh haduh kumba 20-22 ngut ei ei ki MLA ha ka elekshon ba la dep lada jia ba u Dr. Mukul Sangma um shym la leit pynïasoh sha ka All India Trinamool Congress (AITC)
“Ka jingshisha, nga mynjur lang bad phi namar mynta phi ïohi ba lada ngi synroplang ïa ka vote ba ïoh ka TMC bad ka Congress, ngi la tikna ba ngin ïoh ym duna ïa ka 20-22 ngut hynrei kaei kaba nga ngeit ka long ba man u ksew u don la ka jong ka sngi. Mynta ka lah ban dei ka sngi jongnga, lashai ka jongphi hynrei la shisngi pat ka lah ban dei jong kiwei pat. Kane ka dei shi bynta jong ka jingim,” u la ong.
Tangba, na ka liang u Bah Pala pat um shym la treh ban kren ei ei la u Dr. Mukul u la leh ïa kaba bakla da kaba leit ban pynïasoh sha ka AITC bad ong ba kan kham biang ïa u Dr. Mukul ban jubab ïa kane ka jingkylli bad la ka jingleit jong u ban mih na ka Congress kadei kaba biang ne kaba bakla.
Halor ka jingkylli, utei u MP ka Shillong u la ong ruh ba ym don ki nongïalam Congress kiba la leit ban kynduh ïa u state President ka AITC bad MLA ka Nongthymmai, Bah Charles Pyngrope ban wanphai biang sha ka party.
“Kan long kaei kaban pynlehrain ïangi lada jia ba ngi leit ban khot bad khroh ïa u president jong kawei pat ka party ban wan pynïasoh bad ngi. U la ieh ïangi bad u la dei ruh u briew uba la rangbah bha. Ngim shym la leit ban kynduh ïa u Bah Charles.”
