Nongstoiñ, Risaw 21: Ïa ka kyrteng shnong Mawïamsyiem la shim na ka ktien Garo kaba ong Rongthe Raja Krappa, kaba ka jingmut ka long u Maw ba ïam u Syiem lada kylla ha ka ktien Khasi. Kane ka long katkum ka jingong u bah Passtar Nongshillong sordar shnong jong katei ka shnong, u ba la pynwan dur ïa katei ka shnong ha ka ktien Khasi bad la jer noh shisyndon ïa ka kyrteng jong katei ka shnong kum ka Mawïamsyiem, kaba u la ïoh ruh ban seng naduh ki 30 snem mynshuwa.
Lah ban kdew hangne ba katei ka shnong ka dei kawei na ki shnong kaba dang hap hapoh u pud u sam jong ka West Khasi Hills District, hapoh ka jingsynshar jong u Phlowel Syiem, Syiem ka Hima Nongmynsaw Syiemship. Katei ka shnong ka dei ka shnong kaba don ha khappud ka jylla Meghalaya bad Assam, kaba don kumba 200 tylli ei ei ki tnum ïing haba kheiñ kyllum lang haduh u snem 2022.
Kaba sngewtynnad shuh shuh ban ïohsngew shaphang katei ka shnong ka long ba ha katei ka shnong, ki don haduh lai tylli ki kynhun balang Khristan, kaba kynthup ïa ka Katholik, Presbyterian bad ka Baptis. Hynrei la ong ba baroh lai kynhun la pynlong jingïaseng lang tang ha kawei ka ïingmane, namar ba ki dang don tang khyndiat ngut ki para bangeit.
La ong shuh shuh ba ki nongshong shnong jong katei ka shnong ki la duh ruh ïa ka ban thep vote ha ka jylla Meghalaya. Hynrei hadien ba utei u bah Passtar sordar katei ka shnong Mawïamsyiem u la trei bor bah, la ïoh biang ïa ki EPIC kiba la shah pynduh bad la lah ban thep vote biang ha jylla Meghalaya. Hynrei dang don pat ki katto katne tylli ki shnong kiba na katei ka thaiñ kiba la duh noh bad ki bym pat lah ban pynphai haduh kine ki sngi.
Shuh shuh, ka shnong Mawïamsyiem kum kawei na ki shnong kaba don ha khappud ka jylla Meghalaya bad Assam, khambun ki nongshong shnong jong katei ka shnong ki don tang ki jaidbynriew Khasi bad ki Garo. Ym tang katta, ka dei ruh ka shnong kaba dang sahdien bha ha kiba bun ki liang, la ka long ka umbam umdih, ka bording, bad khamtam eh ka surok kaba dei u budlum ka kamai kajih ne ka roi ka par.
La ong ba ïa ka ïing dorbar ruh la shna hi da ka bor shnong, nangta watla ki khynnah skul ki don da ki spah ngut, hynrei wat tang kawei ka skul ruh ym shym la don satia lait noh kawei kaba la shna hi da ka bor shnong. Ym tang katta hynrei jan baroh ki surok ki dei kiba la shna hi da ka bor shnong tang lyngba kaba trei bor met da ki khun shnong, khlem ka jingïarap jongno jongno ruh em wat lada ka dang dei tang ka surok khyndew.
Katei ka shnong kat haduh kine ki sngi kam pat don kano kano ka jingïakajia ne ka jingïaknieh pud hapdeng ka sorkar jylla Meghalaya bad ka Assam. Hynrei, lada ka sorkar jylla Meghalaya kam phai khmat sha katei ka thaiñ, lah ruh ban ong ba lehse ha kawei ka sngi katei ka thaiñ shen kan sa hap ha kajuh ka apot kumba la jia ïa ka Langpih bad ïa kiwei kiwei.
U bah P.Nongshillong sordar ka shnong Mawïamsyiem, u la ong ba lah bunsien ki nongmihkhmat ki la wan uwei hadien uwei, hynrei ki la kut tang ha ki jingkular khlem da pyndep wat tang kawei ruh ban pynurlong bad ym don mano mano ruh kiba phai khmat lem ïa ka thaiñ.
