Ka “dur ba shisha” jong ka Sorkar MDA kan sa paw ynda la shongthait u Chief Justice: Bah Pala

By Mawphor News Desk On Oct 22, 2023

Shillong, Risaw, 20: U nongïalam jong ka Seng Congress u Bah Vincent H. Pala u la ong ha kaba ïadei bad ka jingtih bad ka jingshalan beaiñ bad ïa u dewong, ka ‘dur ba shisha’ jong ka Sorkar MDA ba la ïalam da ka National Peoples Party kan sa paw hadien ba la shongthait u Chief Justice ba mynta jong ka Ingbishar Meghalaya High Court.
Ha ka jingïakren bad ki lad pathai khubor u Bah Pala uba long ruh u MP jong ka Shillong u la ong ba ka jingtih be-aiñ bad ka jingshalan ïa u dewiong ka la kham hiar mynta la katto katne bnai.
“Kumba ju long ki briew jong ki High Level ki ju wan bad tied ïa ka jingkhang jong ki nongkhaii ba ka ïa kali phi yn sa pyllait lada phi ai katne, hynrei mynta kata ka jingleit tied jingkhang ka la sangeh hynrei lajan baroh ki dang ap khmihlynti lano Chief Justice un shongthait noh bad nga tharai ïa ka ban sa jia hadien phin sa ïohi ynda u Chief Justice u la shongthait,” u la ong.
U Bah Pala u la ong, “la jan baroh ki la ïakren bad nga, bun ngut ki paralok jong nga kiba ju im ha ka kam khaii dewiong, bun ngut ki paralok jong nga kiba don karkhana bad kiwei kiwei ki jait kam kiba don bynta bad ka kam dewong, la jan baroh ki sheptieng ïa u Chief Justice bad ynda u la shongthait, ïa ka dur ba shisha jong ka Sorkar phin sa ïohi.
Dang ha ka 16 tarik, Ïaiong, u Bah Pala u la ïaroh ïa u Symbud Myntri Rangbah uba peit ïa ka tnat Kam Pohing Bah Prestone Tynsong uba la pynkut ïa ka “high level”, ba la kynnoh ba ka dei kaba ju donkti ban khaii be-aiñ ïa u dewiong na ka jylla.
“Nga ïaroh ïa u Bah Tynsong uba la pynkylla ïa ka “high level” sha ka “zero level” kumba ka long mynta. Naduh ba u Bah Tynsong u la shimti ïa ka tnat Home (Police), kam don shuh ka High-Level,” la ong u Bah Pala.
Haba kylli, u Bah Pala u la ong ba ki kam be-aiñ ki la kham hiar ïa mynta namarba baroh baroh ki dang ap lano u Chief Justice un shongthait noh na ka kam.
Ha ka 31 tarik, Nailar, ka Ingbishar Meghalaya High Court ka la byrngem ban leh da kaba tyngeh ïa ki ophisar ka Sorkar Jylla ha kaba ïadei bad ka jingtih be-aiñ ïa u dewiong ha ka jylla.