Shillong, Risaw, 21: Ki Pulit ka kynhun Anti Narcotic Task Force (ANTF) ka East Khasi Hills District ha ka sngi Thohdieng ki la ïohkem ïa ki lai ngut ki snar khaii drok najan Law College, Dhankheti, Shillong.
Katkum u kyrwoh ba la phah da u Superintendent of Police (SP) ka East Khasi Hills Bah Sylvester Nongtnger, ki lai ngut kiba la shah kem ki long u Marvince Maja, 43 snem ka rta bad u Phiralang Dkhar 42 snem ka rta kiba sah ha Mawlai Nongmali, Block III, Shillong bad u Imti Ao Shylla 47 snem ka rta uba sah ha Kharmalki, Malki (shadien ka Law College),Shillong.
Na kine ki lai ngut ki Pulit ki la ïoh ban kurup ar tylli ki synduk thep sabon ba la thep ïa u drok Heroin uba khia 23.95 gram, ka pisa T. 44,500 hajar, kawei ka kali Venus, kaba dang thymmai rong rupa bad lai tylli ki mobile phone.
