New Delhi, Risaw, 21: Ha ka ”Sngi Kyrpang jong ki Pulit’ u Myntri ka tnat Kam Pohiing bad Cooperation u Amit Shah u la pynpaw ka jingsngewnguh kyrpang ïa ki Pulit ba la aiti ïa la ka jingim ha ka National Police Memorial ha New Delhi, ha ka sngi Saitjaiñ.
Ki kynrem ki lyndan ha ryngkat u Myntri Khynnah ka tnat Kam Pohiing, u Ajay Kumar Mishra bad u Secretary ka tnat Kam Pohiing ki la ïadon lang ha kane ka sngi.
Haba kren kum u Kongsan, u Amit Shah u la pynpaw ka jingsngewnguh ïa ki 36,250 ngut ki Pulit kiba la aiti ïa la ka jingim na ka bynta ka jingshngaiñ hapoh ka ri bad ki jaka khappud jong ka ri naduh ba la ïoh jinglaitluid.
U la ong ïa ki bahaiing jong kine ki Pulit ba ka India ka dang jam shaphrang ha baroh ki kam mynta, ka nongrim jong kane ka dei ka jingaiti jong ki Pulit ïa la ka jingim bad ka ri kan ym klet ïa ki jingnoh synniang jong ki.
U la ong ba ym lah ban don ka jingshngaiñ hapoh ka ri bad ha ki jaka khappud jong kano kano ka ri khlem ka rynsan ki Pulit kaba peitngor. Na baroh ki briew kiba trei ha ki kam bapher bapher, u la ong ba ka kam kaba jynjar duh ka dei jong ki Pulit kiba trei miet bad sngi, ha ka aiom khriat ne shit, ka por ki tamasa, ki Pulit kim ïoh por ban rakhe ïa ki tamasa bad kiba haiing jong ki.
U la ong ba ki Pulit ki ai ïa ki snem ha ka jingim jong ki ha kaba ki jngai na kiba haiing ha ki jaka khappud jong ka ri bad ki ïada ïa ka ri lyngba ka jinglenlade bad ka jingshlur. U Shah u la ong ba la ka dei ka jingïaleh pyrshah ïa ki kynhun pyntriem, ka jingtehlakam ïa ki kam beaiñ, ka jingpeit ïa ka jingïaid ryntih ka shnong ka thaw, ka jingïada ïa ki briew ha ka por ba lynshop ki bor ka mariang bad ki jingjia ba sngewsih, lane ha ki por jong ki jingeh kum ka por jong ka khlam Corona, ki Pulit ki la pyni ïa la ka jingtrei shitom ha baroh kine ki kam. Ha une u snem ba la dep, naduh ka 1 tarik u Nailur, 2022 haduh ka 31 tarik u Nailar, 2023, 188 ngut ki Pulit ki la aiti ïa la ka jingim ban pynthikna ïa ka jingshngaiñ bad wanrah ïa ka jingïaid ryntih ha ka imlang sahlang ha ka ri.
U Shah u la ong ba u Myntri Rangbahduh ka ri u Narendra Modi u la kyntu na ka bynta ka Amrit Kaal. U la ong ba naduh ka jingkut jong ka jingdap 75 snem ka jingïoh jinglaitluid haduh ka jingdap 100 snem ka jingïoh jinglaitluid, kine ki 25 snem ki dei na ka bynta ka jingkyntiew ïa ka ri ha baroh ki kam. Na ka bynta kane, 130 klur ngut ki briew jong ka ri ki la bam smai na ka bynta kane bad kumta, ym don mano mano ba lah ban pynsangeh ïa ngi na ka jingpoi sha ka kyrdan kaba halor tam ha baroh ki kam. U Shah u la ong ba ha kine ki 10 snem ba la dep, ki jingjia kiba ïadei bad ki kam pyntriem, ka jingpynkulmar ki lehnoh, ki kam naxal bad ki jingïathut hapdeng ki jaitbynriew ki la hiar da 65% bad kane ka dei namar ki sienjam jong ki Pulit ba shlur jong ngi.
U pynpaw ruh ba ha kine ki snem ba la dep, ha ka jingtrei lyngba ka NDRF, ki shipai na ki kynhun Pulit bapher bapher ki la ïoh jingïaroh hapoh ka ri bad shabar ri ruh haba ki la trei ha ki kam kiba ïadei bad ka jingai jingïarap ha ka por ba lynshop ki bor ka mariang. U la ong ba haba ngi rung ha kane ka Amrit Kaal jong ka jingïoh jinglaitluid ka India, ka Sorkar India, hapoh ka jingïalam jong u Myntri Rangbah Duh u Narendra Modi, ka dang wanrah lai tylli ki aiñ ba thymmai ki ban pynkylla khait ïa ki kam aiñ. U la ong ba kine ki lai tylli ki aiñ kin wan bujli ïa ki aiñ kiba la buh naduh ka por jong ki nong Bilat bad kin pyni ïa ka jinglong tynrai jong ka India bad ïada ïa ka hok jong baroh ki nongshong shnong katkum ka Riti Synshar jong ka Ri. U la ong ba u Myntri Rangbah Duh, u Narendra Modi u la ban jur halor ka jingpynkut ïa ka jingsahteng jong ki jingbishar ha ki iingshari. U la ong ba hapoh ka jingïalam jong u Myntri Rangbah Duh, ngin kot sha ka thong ban wanrah ïa ka jingshai bad ka jinstet ha ki kam aiñ lyngba ka Police Technology Mission, 3 tylli ki aiñ ba thymmai bad ICJS.
U la ong ba ha ka jingbteng ïa ka jingkyntait ïa ki kam pyntriem, ka Sorkar Modi ka la wanrah ïa ki aiñ kiba khlaiñ bad ka la shim ïa ki sienjam ban don ka kynhun kaba tbit tam ha ka pyrthei kaba ïaleh pyrshah ïa ki kam pyntriem da kaba wanrah ïa ka Police Technology Mission ban pynthymmai ïa ki kam Pulit. U la ong ba na ka bynta ka bha ka miat jong ki Pulit, ka Sorkar ba ïalam da u Myntri Rangbah Duh ka la wanrah ïa ki jingpynkylla ha ka Ayushman-CAPF, Housing Scheme, CAPF e-Awas Web Portal, Prime Minister Scholarship Scheme, Central Ex-gratia, Disability Ex-gratia, Air Courier Services bad Central Police Welfare Store.
U Amit Shah u la ong ba ka police memorial kam dei tang ka dak hynrei ka dei ka jingithuh ïa ka jinglenlade bad ka jingtrei shitom jong ki Pulit na ka bynta ka jingtei ïa ka ri. U la ong ba ka Sorkar ka ieng skhem na ka bynta ka bha ka miat jong ki Pulit bad ki bahaiing jong ki.
