Ka NPP ka khwai da ki nongïalam ka TMC bad BJP ban pynïakhun ïa ka elekshon MP, kynnoh u Bah Pala

Shillong, Risaw, 21: U nongïalam jong ka Seng Congress u Bah Vincent H. Pala u la kynnoh ba ka National People’s Party (NPP) kaba bat ïa u lakam synshar ha ka jylla ka la khwai da ki kyrtong na ka All India Trinamool Congress (TMC) bad na Bharatiya Janata Party (BJP) ban pynïakhun ïa ka elekshon sha Lok Sabha ka ban sa long ha u snem ban sa wan.
“Ka NPP hi kam don kyrtong (na ka bynta ka Shillong Seat). Mynta ki shu khwai na ka TMC lane na ka BJP. U Bah Himalaya Shangpliang u dei uwei napdeng jong ki, uba ki la ïoh khwai na ka BJP,” la ong u Bah Pala ha ka jingïakren bad ki lad pathai khubor.
U Bah Pala u la kynnoh ruh ba ka NPP ka la pyrshang ruh ban khroh wat ïa u MLA barim jong ka Umroi u Bah George B. Lyngdoh na ka TMC. “La don ba pyntip ïa nga ba u Bah George Lyngdoh ruh u dei uwei. Namarkata kim (NPP) don wat tang u kyrtong bad na kata ka daw ki hap ban shu khwai (na kiwei ki seng saiñpyrthei),” u la ong.
U Bah Pala uba long ruh u MP ka Shillong u la ong shuh shuh ba u don ka jingartatien ba ka NPP kan ai vote wat ïa u kyrtong ka NPP ha ka elekshon Lok Sabha.
“Nga artatiet wat ka NPP kan ai vote ïa u kyrtong ka NPP namarba ki wan na kiwei pat ki seng saiñpyrthei bapher bapher bad ki dei kiba dang shu pynïasoh thymmai bad kam long kaba suk ïa ki nongkyrshan haba ki riew thymmai ki pynïasoh party. Ha ka elekshon ba ladep, ki (NPP, BJP & TMC) ki ïashrut kum ki miaw ki ksew hynrei kynsan kynsan ki wan bad ki ong, une u riewialeh jong ngi, une u kyrtong jong ngi. Ngam tharai ba kata kan don jingktah,” u la ong.
Halor ka jingkren ba dang shen jong u nongïalam ka NPP u Bah Sniawbhalang Dhar uba long ruh u Symbud Myntri Rangbah ba ka NPP kan kham ïoh bor ha Shillong Parliamentary Seat namarba ka kham ïoh bun ki vote haba ïanujor bad kiwei kiwei ki seng saiñpyrthei ha ka elekshon sha ka Iingdorbar Thawaiñ 2023.
“U Bah Sniawbha kum u nongïalam u don la ka jong ka jingïohi hynrei ki nongthep vote ki dei kiba kham kongsan. Haba ngi phai sha ki nongthep vote ka long kaba eh ban pynïadei hapdeng ki nongthep vote jong kawei ka party bad kiwei pat ki party. “Ngam tharai ïa kaei kaba u ong, ngam mynjur hi ruh hynrei lada phi peit ïa ka jingshisha kaba ladep ka jingïoh votte ka ïapher bad nga tharai ba ka suk ban shu kren tang ka ktien hynrei ban pyntreikam pat ka long kaba eh,” u la bynrap.
Haba pynpaw ïa ka jingsngewskhem ba un da jop biang ïa ka Shillong Seat u Bah Pala u la ong, “kumba ka long, nga don ka jingsngew skhem bad ngam lah ban ai syrnot da lade ïa lade bad ngam kwah hi ruh ban da kren bun ktien hynrei nga tharai ki paidbah ki ladep sakhi ïa kaei kaba la jia ha ka Jylla Manipur, ki paidbah ki ladep sakhi ïa ki ishu bad ïa ki polisi kiba long pyrshah ïa ki Khristan bad kiba long pyrshah ïa ki ritpaid. Nga ngeit ba ki paidbah kin dang kyrshan ïa ka Congress ha kane ka kynti.
“Ha,oid, ym lah ban len ïa ka jingshisha ba ka jingpyrshah kan mih beit hynrei phin sa kham ïohi kham bha lada phi bishar ïa ka jinglong jingman jong ki party ban ïa ki kyrtong.
Haba kylli, hato u don neem ka kabu lada ki paralok kiba ïatreilang hapoh ka Kynhun MDA ki sei la u jong u kyrtong na ka bynta ka Shilong Seat, u Bah Pala u la ong, manla uwei pa uwei kin ïakhun ban ïoh ïa ka jingithuh bad ban ïoh ïa ka jingjop.