Shillong, Risaw 22: Sa shi sien pat ka kynhun lehkai kriket jong ka Meghalau ka la shahrem biang ha ka lympung lehkai jong ka yed Mushtaq Ali Trophy, bad kane ka la jia namar ka jingbym seisoh ki player tied ka kynhun wat hadien ba ki rangkawangbol ki la lah ban lehkaibha. Ha kane ka jingïakhun ka Meghalay ka la shah pynliem da 66-ron ha ka Chhattisgarh ha ka jingïalehkai kaba la long ha Jaipur hynnin ka Sngi Saitjaiñ.
Haba phai sha ki rangkawangbol ka kynhun, u Akash Kumar Choudhary (3/36 naki 4 over) bad u Anish Charak (3/41 naki 4) baroh arngut ki la ïoh ban khur mar lai wicket, katba u Riboklang Hynniewta u la khur 1/19 naki 3 over, ha kaba ka Chhattisgarh ka la shah pynsah da 162/7 haduh kaba kut ka 20 over.
Na ka liang jong u Kilco Marak, watla u khlem shym la ïoh ban pynhap wicket ha kane ka jingïakhun, hynrei u la lah ban sei madan ïala ka jong ka sap ban khanglad ïa kin player ka Chhattisgarh ban ïoh kamai ron, bad na ki 3 over u la ailad tang 14 ron.
Shuh shuh, ki la don saw ngut ki player ka Chhattisgarh (batter) kiba la shah pynhap khlem da ïoh kamai wat tang shi ron, kynthup ïa u wei u ba la shah pynhap ha ka over ba nyngkong jong ka Inning ha u Choudhary.
Haba phai pat sha pali tied (batting), ka Meghalaya ka la ïohlad ban kynjoh tang sha ka 96 ron ba hap haduh 9 ngut. Dei tang u Nakul Verma (20 ron) u ba la kamai khambun ron na bynta ka kynhun, katba u Rajesh Bishnoi u la ïarap 15 ron, na ka liang jong u Choudhary u la pyndep da 10 ron shuwa ban kut ka inning.
Ka Meghalaya kan sa aireng pat sa ïa ka Jammu& Kashmir mynta ka lah Sngi U Blei. Kum ka Meghalaya, ka kynhun J&K ruh ka la mad namrem ha baroh saw sien.
