Nongpoh, Lber 07: Namar ka jingthang khlaw pathar jong ki riew shim kabu, khamtam ha kum kane ka por bala sdang ka aiom Pyrem bad tyrkhong, kawei ka khlaw shnong jong ka shnong Mawrathud ha Ri-Bhoi District kala kem ding kynsan haka janmiet jong ka 5 tarik Lber haduh bala pynlong ïaki paidbah nongshong shnong ban mih paidbah ban pynlip ïa katei ka ding kaba la klang bad bamduh ïaka khlaw shnong.
U Bah Clever Shadap Rangbah Shnong ka shnong Mawrathud u la ïathuh ba katei ka jingjia kala jia naka jingthang dusmon ki riew shim kabu, ha kaba ki paidbah kila iohi haka por janmiet ba ka ding kala klang ïa katei ka khlaw shnong bad mar mar kila pynlong ka jingpyrta shnong ban leit pynlip ïa katei ka ding, bad mar mar naka liang ki paidbah kila ïamih katba lah ban pynsted ban pynlip ïa katei ka ding haka jingshimkhia lang ki samla jong katei ka shnong, ki nongïalam jong ka Land and Forest Community na katei ka shnong.
La ong ruh ba ki thylliej dieng kila ïeng ban bam shngiam ïa katei ka khlaw bad da ka jingshimkhia ki paidbah la lah ban pynlip noh ïa katei ka ding ha ki katto katne ki bynta ban lait ban pur sha kiwei ki bynta, hynrei katei ka ding ka dang neh haduh ka por mynstep jong ka 6 tarik.
Halor katei ka jingjia naka liang ka shnong Mawrathud kam pat tip thikna ïaka daw jong ka jingjia hynrei la suba ba don ki riew shim kabu kiba leit thang ïa katei ka khlaw bad buh ruh ka jingmaham sha ki paidbah kumba ka aiom tyrkhong kala sdang, ki paidbah ki dei ban husiar bad kiar naka thang dusmon ïaki khlaw ki btap kaba pyniap ïa shibun ki jingthung jingtep, ki mrad ki mreng bad ki sim ki doh, hynrei ban shim ka jingkitkhlieh ban sumar ïaka mei mariang.
