Sngewnguh ka SKWJ bad KSU ba ithuh ïa ka B.Ed College ha Kiang Nangbah

0

Jowai Lber 07: Ka Synjuk ki Waheh Shnong Jowai ha rynkat ka Jaiñtia Student Union (JSU) sengkmie hadien ka jingïoh jingtip ba ka sortkar lyngba ka National Council for Teacher Education (NCTE) kala ithuh ïa ka B.Ed College ha Kiang Nangbah Government College, Jowai.
Na ka liang jong kine ki ar seng mynta ka sngi kila pynpaw ka jingsngewnguh ïa ka sorkar namar ïa kane ka jingdawa B.ED kala sdang naduh ka snem 1987 bad mynta ka kynti kala urlong da ka jingïarap ka sorkar lyngba u Myntri ka pule puthi ha kine ki snem ba la dep.
U General Secretary ka Synjuk ki Waheh Shnong ma Requoma Rq Laloo ha ka jingkren sha ki lad pathai khubor ula ong kane ka kam ba sahteng kala urlong noh bad kaba donkam ka long ban pynbiang ïa ki nonghikai, ki nongtrei (Staff) khnang ba ka rukom pdiang Admission ïa ki samla pule kan long kaba ïaid beit ïaid ryntih ha ki sngi ban wan.
Katba na ka liang u General Secretary ka JSU samla Treiborlang Suchen ula pynpaw ka jingsngewnguh ïa u ma Lahkmen Rymbui uba trei shitom ban pynïoh ïa kane ka B.Ed College ha Kiang Nangbah Govt. Collge ïa kaba la ithuh da ka NCTE na nongbah Delhi.
Kumba long mynta u samla Suchen ula ong ïa ka Building klas kaba don ha Mynthong la pynlong ïa ka kum ka 10+2 Higher Secondary School, halor kane ka seng kala dep ban buddien bad leit kynduh ïa u myntri ka pule puthi ha u bnai August mynshem snem da kaba phah ïa ka jingthoh sha ka Delhi lyngba ka Member Secretary NCTE ha u bnai September, hynrei ha kane ka 5 tarik mynta u bnai la ïoh jingtip ba la ithuh pura ïa ka kum ka B.Ed College kaba long 4 snem ka (Integrated Course).
“Ka jingïoh ïa kane ka Course B.A. B.Ed bad B.Sc. B.Ed College ka long shisha ka jingkyrkhu ïa ki khun samla jong ka Ri-Lum Jaiñtia ba kin ïoh ban pyntbit ïalade ha ka liang namar hapoh ka District hi baroh ym shem la don kum kane ka jaka pule”, halor kane u samla Suchen ula pyntikna kum ka seng bad ka Synjuk Waheh shnong kin dang ïaibteng ban buddien ïa kane lyngba ka jingwan jong kane ka sorkar ba thymmai MDA-kaba ar.

Leave A Reply

Your email address will not be published.