Kiwei ki shu kam hynrei ka NPP kan thaw ïa ka sorkar ha u 2023: President NPYF
Shillong, Rymphang 20 : Ka National People’s Party lyngba ka youth wing jong ka, ka NPYF ka la ong ba kiwei ki party ki shu kam ba kin sa jop bun ngut ha ka elekshon MLA kaban long ha u snem 2023 hynrei na ka liang jong ki, ki sngewskhem ba ka NPP kan sa thaw ïa ka sorkar ha katei ka samoi ban wan.
“Kam don kano kano ka jingeh ïangi ban ïakhun ïa kino kino ki party ha ka elekshon ban wan. Khlem pep ka UDP kan dei kawei na ki party kaba ngin sa kynduh ban ïakhun ha man ki constituency jong ka jylla,” ong u President jong ka National People’s Youth Front (NPYF) Bah Kitborlang Nongrem.
Nalorkata, u ong ruh ba dang shen ki la ïohi ïa ka jingkam jong ka UDP kaba ong ba kin sa ïalam ïa ka sorkar ha u 2023. “Ngi ruh ngi ong ba ngin ïalam beit ïa ka sorkar ha u 2023 bad ngin ïoh ban thaw hi marwei ïa ka sorkar,” u la bynrap biang.
Nangto u ong ruh ba ki la ïohi ïa ka jingkam jong ka HSPDP kaba ong ba khlem ki party riewlum ka NPP kan ym lah ban ieng. “Nga ruh nga ong ha kane ka por ba khlem ka NPP ki party riewlum kin ym lah ban ieng,” u la ong da kaba bynrap ruh ba naduh mynta ka party ka la long kaba la pynkhreh ban ïakhun ïa katei ka elekshon.
Ha kajuh ka por, u Bah Nongrem u la ong ruh ba ka party mynta kan sa ïoh ïa ki kyrtong kiba kynsai kynsai kiban aireng ha kane ka elekshon ban wan na ki constituency bapher bapher jong ka jylla.
Shwa kane, u la pynpaw ruh ba kum ka party ki sngew sarong haduh katta katta ba arngut na ki MP jong ka party, kata u Dr. WR Kharlukhi bad ka Agatha Sangma ki la pynsngew hapoh Parliament ïa ka jingdonkam ban pynrung noh ïa ka Ktien Khasi bad Garo ha ka Khyrnit kaba Phra jong ka Riti Synshar jong ka Ri.
“Ngi sngewsarong haduh katta katta ba ki MP jongngi ki la ïasaid haduh Parliament ïa ki ishu kiba ki nongshong shnong ka jylla ki thrang bad ki angnud dik dik,” u la ong.
Kawei pat ka bynta kaba utei u nongïalam jong ki samla NPP u kdew ka long ba ka sorkar hapoh ka jingïalam jong ka NPP ka la lah ban ruh ban ïaid shakhmat haba ïadei bad ka ishu Iew-themmawlong, nangta ka ishu khappud, bad bun kiwei kiwei.