Kwah ka NERIE-NCERT ban pynrung ïa ka saiñ jingtip ki riewlum ki lynnong kot

0

Shillong, Rymphang, 20: Ka NERIE- NCERT, Umïam, Shillong kaba long ka shnat treikam jong ka Sorkar India kaba peit ïa ka jingïaid beit jong ka pule ka puthi hapoh ka ri India baroh kawei dang shen ka la pynlong ïa ka jingïathir ïatai halor ka phang, “Integretion of Indigenous Knowledge in the School Curriculum: Prospect and Challenges.”

Ka jingpynlong ïa kane ka jingïathir ïatai kaba ar sngi ka long ban sngewthuh shai haduh katno ka saiñpyrkhat bad ka saiñ jingtip jong ki jaidbynriew riewlum ritpaid ka long kaba kongsan bad kumno ban pynrung noh ha ki lynnong kot.

U Associate Professor u Dr Tulika Dey u la ïathuh ba ka jingpynlong ïa kane ka jingïathir nia ka la long ha ka ri baroh kawei.

U Prof. Nani Gopal Mahanta, kaba long ka Adviser (Education) jong ka Sorkar Assam ka la ïaroh ïa ka NERIE -NCERT, Umïam, Shillong kaba la shimkhia ban pynlong ïa kane ka jingïathir nia bad ong ruh ba ka jinglum lang ïa ki saiñ jingtip jong ki riewlum ritpaid ka long kaba donkam bha ban pynneh pynsah ha ki kot pule.

“Mynshwa ha ki por kiba la leit noh kam da don eh kata ka jingsngewthuh ba ka saiñ jingtip jong ki riewlum ka long kaba donkam namarba la pynrung ha ki kot pule da ka saiñ jingtip kaba wanrah na ri sepngi bad katkum ka jingtyllun jong ki shalyntem ka por,” u la ong bad bynrap, “watla ngam pyrshah ïa ka jingpynrung ha ki lynnong kot pule ïa ka saiñ jingtip na ri sepngi bad ka jingbud katkum ka jingtyllun jong ka por hynrei ka long pat kaba donkam ban lum jingtip bad ban buh jingthoh ïa ki saiñ jingtip jong ki riewlum ritpaid ha ki kot pule.”

U Prof. Mahanta haba bynrap halor kane, u la ong, “haduh mynta ngim da kham pynleit jingmut eh shaphang ki jaidbynriew ritpaid namarba ngi kham ïabeh ïa ki jingtip kiba ngi ïoh lum na ki ri sepngi.”

“Ka ri kum kandidïa ka don palat 260 tylli ki jaidbynriew bad ki jait ktien bapher bapher ba ki kren,” u la ong.

Ha kane ka jingïathir ïatai la ïashim bynta lang da u Principal jong ka NERIE u Prof. B. Barthakur lem bad u Cordinator u Prof. Subhas Chandra Roy bad kiwei kiwei.

Leave A Reply

Your email address will not be published.