Naduh 22tarik yn sdang ka jingleit rung NPP ki MDC ka KHADC

0

Shillong, Rymphang 20 : Bun ngut ki MDC jong ka Khasi Hills Autonomous District Council (KHADC) kin sdang ban leit pynïasoh noh sha ka National People’s Party (NPP), ha kine ki khyndiat sngi ban wan.

Ki tyllong khubor ba tikna ki ïathuh ba katei ka jingpdiang burom ïa kitei ki MDC kiba dei na kiwei ki party bapher bapher kynthup ïa kiba don ha ka Liang Synshar bad Liang Pyrshah kan sdang naduh ka sngi Ba-ar jong kane ka taïew.

Napdeng ki san ngut ki MDC kiba la pyntikna ban wan ïasoh sha ka NPP, arngut ki dei kiba la tikna. Kitei ki kynthup ïa ka MDC jong ka PDF na Mawhati, Kong Macdalyne Sawkmie Mawlong bad uwei pat dei u Bah Fantin J Lakadong MDC jong ka Malki Laitumkhrah uba la dep ban pynbna lypa la katto katne por.

Haba pyntikna ïa kane, katei ka MDC ba dei ruh ka Executive Member ha ka EC ba mynta ka la kubur ba ka la pynkhreh ban leit ïasoh noh sha ka NPP.

“Kadei ka jingshisha ba ngan leit ïasoh noh sha ka NPP ha kane ka sngi Ba-ar,” la pyntika ka Kong Macdalyne haba kren bad u Mawphor.

Haba pyrshang ban ïakren bad ki heh ka NPP ki bym kwah ban pynpaw kyrteng ki la ïathuh ruh ba ka jingïakren mynta ka la ïaid shaid shaid bad ki lai ngut kiwei pat ki MDC. Da kaba kyntait ban pynpaw kyrteng hynrei la ïathuh ba uwei u dei na West Khasi Hills, uwei na Eastern West bad wei pat na East Khasi Hills.

La ïathuh ruh ba ka jingpdiang burom ïa kitei ki MDC bad ki nongïalam ba hakhmat jong kiwei ki party sha ka NPP kan sdang naduh ka 22tarik mynta u bnai.

Kumban shu kdew hangne, ka them Ri Bhoi ka la shongshit bha ha kane ka taiew ba la dep hadien ba ki nongïalam ba hakhmat jong ka UDP na Umsning ki la mih ban leit kyrshan noh ïa ka MDC jong ka Umsning, Kong Macdalyne Sawkmie Mawlong kaba shen kan sa leit ban pynïasoh noh sha ka NPP

Leave A Reply

Your email address will not be published.