Shillong, Rymphang, 28: Ha ka sien kaba nyngkong u Myntri uba khmih ïa ka tnat Pule Puthi ka Sorkar Jylla u Rakkam A. Sangma u la phah ïa u kyrwoh kitbok kitrwiang sha ki khynnah skul ki ban sa ïakhun ïa ka eksamin Secondary School Leaving Certificate (SSLC) bad ka Higher Secondary School Leaving Certificate (HSSLC) ki ban sdang naduh u bnai Lber, 2024.
Lyngba ki lad pathai khubor, u Rakkam A. Sangma u la kyntu ïa ki khynnah skul ba kin klet shwa ïa mynta shipor ïa kino ki kam sngewbha bad khamtam eh ïa ki jingpynbyrngia ha ka Mobile Phone bad ban pynleit jingmut shwa ban minot tang ha ka kot namarba kine ki ar tylli ki eksamin ki dei kiba kongsan tam ha ka jingim jong ki khynnah skul bad kiba rai ruh ïa ka lawei ka jong ki nangne shakhmat.
Ki don haduh 55,189 ngut ki khynnah ki ban iakhun ia ka eksamin Secondary School Leaving Certificate (SSLC) bad 34,335 ngut ki ban iakhun ia ka Higher Secondary School Leaving Certificate (HSSLC) ka ban sa long ha ka 1 tarik bad 4 tarik, Lber.
Ki don haduh 108 tylli ki centre thoh eksamin jong ka HSSLC bad 159 tylli na ka bynta ka eksamin SSLC ha ki 12 tylli ki districts ka jylla.
