Kitbok ka tnat Sports ïa ki thei U-17 shuwa ban mihkhmat ïa ka jylla

Shillong, Nailur 14: Ka jylla Meghalaya kan sa ïoh ban shimbynta ha ka lympung ïakhun jong ka Subroto Cup Football Tournament 2023 kaba 62 ka ban sa long ha nongbah New Delhi naduh ka 19 tarik haduh ka 26 tarik Nailar, 2023 ha kaba ka Saiden Secondary School Nongpoh, ka lahduh ha ka State Level Subroto Mukherjee Cup Football Tournament 2023 kan mihkhmat ïa ka jylla ha ka kyrdan ïalehkai U-17 jong ki kynthei.
Na ka liang jong ka tnat ba dei khmih ïa ka Sports, hynne ka Sngi Palei ka 14tarik Nailur, ka la ïoh ban pynlong ïa ka prokram kitbok kitrwiang bad ruh ban ai mynsiem ïa ka kynhun ki thei ka Meghalaya Subroto Cup Football Team 2023 U-17, kata ka Saiden Secondary School Nongpoh ha MFA Football Ground ha ka por 1 baje nohphaisngi.
Ha kane ka sngi ba pynlong ïa kane ka prokram, i Kong Isawanda Laloo, IAS Director Sports & Youth Affairs jong ka sorkar jylla Meghalaya i la wan kum i kongsan ha ryngkat bad u Bah P.B. War Nongbri, Assistant Director Sports & Youth Affairs, u District Sports Officer jong ka Ribhoi District, Headmaster jong ka skul Saiden Secondary School Nongpoh, ki nonghikai lem bad kiwei kiwei. La pynïaid ïa kane ka prokram da u Bah K. Passah, Assistant Director Sports & Youth Affairs.
La ïoh ban ai jingkren lyngkot ha kane ka prokram da u Bah B. L. Nongbet, DSO jong ka Ribhoi District bad ruh ki kyntien ban ai mynsiem ïa ki player na i kongsan, Kong Isawanda Laloo.
Ha kane ka lympung, la phiah haduh phra tylli ki Pool kiba la bynta mar saw kynhun kawei kawei. Ka kynhun jong ki thei Under-17 jong ka jylla ki la hap hapoh jong ka Pool-G, kiba kynthup ïa ka Goa, Uttrakhand bad ka KVS.
Yn plie pyrda ïa kane ka lympung naduh ka 19 tarik ha kaba ka Mizoram kan aireng pyrshah ïa ka Tripura, katba ki thei lehkai Under-17 jong ka Meghalaya kin sdang ïa ka lynti ïaid jong ki ha ka 20 tarik, bad ka jingïakhun kan long pyrshah ïa ka Goa, nangta ha ka 21 bad 23 tarik pyrshah ïa ka KVS bad ka Uttrakhand.