Katno ka long kaba sngew synei ban pyrkhat shaphang kito kiba la ngat ha ka apot jong ka jingkyrni ha ka jingdih drok namar katei ka ktah ym tang ïa ki shimet hynrei ïa ka iing ka sem baroh kawei. Ki drok kiba dei ki jingdih ba pynbuaid ki long ki atiar jingdum ba shyrkhei tam bad ki dei ki mar ba remdor bad lah ban ong dei tang kiba riew spah kiba lah ban ïalehkai bad ki. Ka long kaba shyrkhei ban ngop ha kine ki jingriam kiba ym ju lah koit ban ïohi ïa ka jingsdang jong ki, hynrei dei tang haba kito kiba la kyrni kila poi ha u pud ba kim lah shuh ban rieh ba la lah ban ïohi paidbah ïa ki. Ki drok ki dei ki jingdih ne ki dawai kiba trei jai jai bad namarba ki dei kiba remdor ki samla baduk bunsiem kotbor satia bad dei na kane ka daw lada ki ngop kim banse ban leh da kino kino ki kam kam pher wat ban leit tuh tang ban ïoh pyndap ïa ka jingdawa ka met. Ka long kaba sngew suhjer ban tip bad ïohi ba kum kine ki kynja jingdih ki la sdang ban ïoh synshar jan haman la ki dong kiba don ha ka nongbah Shillong, bad ruh ha jan man la ki distrik jong ka jylla.
Ki don shibun ki daw ba ïalam ïa ki samla sha ka jingkyrni dih drok, kawei na daw kaba hakhmat eh ka dei ka jingsynjor jong ka longïing longsem. Ka jingbym poi pyrkhat jong ki kmie ki kpa ban pyrkhing ïa la ki khun ha ka rukom ai pisa kadei ka dawbah kaba pynlong ïa kito ki khun kiba kham tlot ka rukom pyrkhat ban long ki lanot ha kitei ki jingshah pynbiej ha ki paralok. Ym lah ban len ïa ka jingriewspah jong ka imlang sahlang mynta ha kine ki sngi bad dei na ka jingbun palat ka jingkamai ne ka jingïoh pisa ba ki briew ha kine ki sngi kim don por shuh hynrei baroh ki bunkam beit ban kamai bad klet noh ban shakri ha ka rukom kaba dei ïa ki khun ki kti kiba dei ka spah bah jong kane ka pyrthei.
Ka jinglaitluid palat ha ka leit ka wan ryngkat ka jingïoh puk puk ka pisa kadei kawei pat ka dawbah kaba pynlong ym tang ïa ki samla hynrei wat ïa ki heprit ruh ban ngat lang ha katei ka juh ka apot. Ha kaba kut lada kim ïoh ïa u drok ki samla kim salia ban leh ïa kano kano ka kam ruh bad kin ïaleh katlah katïai ban pynngop lem ïa kiwei khnang ba kin long ki nongkyrshan jong ki. Ki nongdih drok kim lah ban shu long nongthied sah, hynrei kin ïit ïa ki lad ki lynti kumno ban long ki nongdie kylla sha kito kiba ki pynngop khnang ba kin lah pat ban kyrshan ïa ka jingdonkam ïalade ruh.
Ban teh lakam ïa kitei baroh, donkam ka jingïatrei lang ym tang na ki Dorbar Shnong ne ki seng samla, seng longkmie hynrei khamtam eh naman la ka tyngkong ïing. Ha kine ki khyndiat snem ba la dep la ju bna ba kum kine ki kam ki jia ha ki shnong kiba ïa shongkhleh bad kiwei pat ki jaidbynriew, hynrei mynta kane ka kam ka la rung wat ha ki shnong ba ïashong tang para khasi ruh. Ka long kaba shyrkhei ruh ba kumno kitei ki samla ba die drok ki la pyrshang ban pynngngop ïa ki khynnah skul kiba dang lung dang rit ka rta.Ka long kaba donkam ïa ki longïing longsem ban long kiba husiar bad kum ki kmie ki kpa donkam ban peitngor bha ïa la ki khun ki kti khamtam eh ha ka leit ka wan bad ka rukom ai pisa ïa ki. Katno ka long kaba sngewsynei ba don ki longiing kiba hap ban mad shibun ki jingeh bad babe kylla haba ki khun ki shah teh shah khum ha u drok.
Wat na ka liang ka Dorbar Shnong ruh ki donkam ban peitngor bad shimkhia halor kane ka phang kaba lah ban ktah jur ïa ka imlang shlang. Ki bor pulit barabor ki long kiba ïatreilang bad ki paidbah ha kiba bun ki khep ba kum kitei. Ka sorkar ka donkam ban shimkhia ban wanrah ïa ki lad jingpynsngewthuh paidbah kiba kham khlaiñ halor katei ka phang khnang ba ki longiing kin long kiba phikir bad kiba peitngor.
Kum ka sorkar kadei ruh ban peitngor ïa kito ki kynhun kiba trei na ka bynta ban ïakhun pyrshah ïa ka jingdih drok bad khamtam eh ïa kito kiba trei na ka bynta kito kiba la ngat ha u drok bad kyrni ha u. Lada ka sorkar ka kloi ban kyrshan ia ki kynhun kiba trei bad iarap ia kito kiba kyrni dih drok, kadei ruh ban iarap ia kito ki kynhun jong ki seng samla da kaba kyrshan ia ki ha kano kano ka rukom khnang ba kin lah ban pynkhlaiñ ban pynshlur ia ki samla lane iarap ia ki samla jong ka shnong ba kin pynlut por ha ki jait jingialehkai kilan met kum ka phutbol, kriket, basketball, lane wat ha ki jingialehkai hapoh kut lane ki indoor game.
