Ban kyntiew ïa ka kam rep, shah jied ka Shnong Chota Killing ban pyndokam da Rural Technology

Nongpoh, Nailur 14: Da ka jingïatrei lang naduh ka University of Science & Technology, Meghalyaa ryngkat ka kynhun na ka IIT, Guwahati ba kynthup ruh 3 ngut ki samla pule na Japan ki la jied ïa ka Shnong Chota Killing na ka bynta ban pyntreikam ïa ki kor ki bor ka juk ba mynta ba la tip kum ka Rural Technology ban kyntiew ïa ka kam rep ka kam riang katei ka shnong nalor kiwei kiwei ki bynta ban kyntiew ïa ka long briew man briew jong ki paidbah ha katei ka shnong.
Ka kynhun jong ka IIT, Guwahati ryngkat ki 3 ngut ki samla pule na Japan ha ka jingïalam u Dr. Siddhartha Singha hynnin ka sngi ki la leit jngoh ïa ka University of Science & Technology, Meghalaya kaba don ha ka shnong Baridua, Khanapara na ka bynta ban pyntreikam ïa ka project ba la tip kum ka Rural Technology kaba kham ban khia na ka bynta ban kyntiew ïa ka kam rep ka kam riang kaba khlem da pyndonkam dawai (Organic farming).
Kane ka shnong ba la shah jied ban pyntreikam ïa katei ka project ka dei ka shnong Chota Killing ha kaba lyngba ka School of Agro and Rural Technology, IIT Guwahati bad ka Department jong ka Rural Development ka USTM ki la shim ïa ka rai ba jied ïa kane ka shnong na ka bynta ban pyntreikam ïa katei ka project.
Haba kren halor kane ka bynta, u Dr Papiya Dutta, Head Department ka Rural Development USTM u la ong, ba kane ka dei ka bynta ba la shim khia ban pynurlong katkum ka thong ka Rural Technology ka ban pyntreikam ha katei ka shnong bad ka thong ba hakhmat eh ka long ban wan rah ka jingkylla ha katei ka shnong lyngba ki kam rep ki kam riang ban myntoi ki nongrep ha katei ka shnong lyngba jong kane ka project ba la jied kyrpang ban pyntreikam ha katei ka shnong.
U la ong ruh lyngba kane ka project ba la ïalam da u Dr. Siddhartha Singha, ka kynhun IITG ka la shim khia ban ïa trei lang na ka bynta ban wan rah ka jingkylla hapoh katei ka shnong. Ki samla pule na ka School of Agro and Rural Technology USTM kynthup ruh 3 ngut ki samla pule na Japan kin ïa trei lang kumno ban kyntiew ïa katei ka shnong kyrpang eh ïa ka kam rep (Organic Farming) nalor kiwei kiwei ki kam ban kyntiew ïa ka longbriew man briew jong ki nongrep bad ki paidbah nongshong shnong ka shnong Chota Killing.
Shuh shuh, u la ong ruh ba ka thong ba hakhmat eh ban pynkup bor ïa ki nongshong shnong da kaba pyntreikam ïa ka rural technology ka long ban kyntiew ïa ka ioh ka kot jong ki lyngba ka jingpyndonkam ïa kine ki Rural Technology ha kam rep ka kam riang bad ki khmih lynti lyngba kane ka project katei ka shnong kan kiew shaphrang ha baroh ki liang, u la bynrap.