Nongpoh, Jymmang 13: Ka kynhun ïalehkai phutbol jong ka Jyntru Sports Club ka ba long ruh ka kynhun ka ba la ïoh ban rah ïaka nam lahduh haka Ri-Bhoi League, kala long ka ba la khreh ban mih ban leit ïashim bynta sha ka Meghalaya State League haka jingïakhun ka ba nyngkong pyrshah ïaka kynhun Mawlai ha kapor 3 baje janmiet.
Ha shwa ba kine ki rang ïalehkai jong ka Jyntru Sports Club kin leit mih khmat na Ri-Bhoi sha katei ka lympung naka liang ki nongïalam ka Ri-Bhoi District Sports Association (RBDSA) hapoh ka jingïalam u bah R.B Shadap kum u President ha ryngkat ka jingïadon lang u MLA ka Mawhati Constituency u Bah Charles Marngar bad ki dkhot ka RBDSA, ki la pynlong ka jingïakynduh lang ha phyllaw ophis ka RBDSA kum shibynta ban ai mynsiem bad ban sneng ban khraw ïa ki rang ïalehkai ha shwa ba kin leit ïashim bynta sha katei ka lympung.
U Bah Charles Marngar MLA ka Mawhati, haba kren haba kren ha kane ka sngi, u la pynpaw ïaka jingkmen ban ïoh ïa don bynta lang ban ïoh khublei kti ïaki kynhun na Ri-Bhoi ha shwa ba kin leit mih khmat sha katei kawei na ki lympung ka ba heh hapoh ka jylla ryngkat ka jingkyrmen skhem ba kin lah ban ïalehkai bha ban rah ïaka namjop na katei ka lympung.
Shuh shuh naka liang u Bah Charles Marngar u la kyntu ruh ïaki rangïalehkai bad kumjuh ruh ki official jong ka kynhun ba kin long kiba don akor haba ki leit ban mihkhmat naka district, namar ka jingdonakor bad ka jingjop jong ki kan dei ka burom bad ka jingsngewsarong ïaka district hi baroh kawei.
