Kitbok ka MCA ïa ki thei U-19 shuwa ba kin leit ïakhun ha ka BCCI’s Women’s U-19 One Day Trophy ha Gujarat

Shillong, Risaw 04: Hynne ka Sngi Balang ka Meghalaya Cricket Association (MCA) ka la ïoh ban pynlong ïa ka prokram ban kitbok kitrwiang ïa ki thei ïalehkai kriket Under-19 ki ban sa mihkhmat ïa ka jylla sha ka lympung BCCI’s Women’s U-19 One Day Trophy ka ban long ha Gujarat.
Ha kane ka sngi la ïadonryngkatlang ki dkhot nongkitkam jong ka MCA, kiba kynthup ïa u Nababratta Bhattacharjee (President jong ka MCA), u Bah Gideon Kharkongor (Honorary Secretary), u Dhrubajyoti Thakuria (Honorary Treasurer) bad u Petermacdonald Kharsawian (Apex Council Member), u Bah Shiningstar Lyngdoh (Manager Cricket Operation) ki Coach lem bad ki player.
La lamkhmat ïa kane ka prokram ba la pynlong ha MCA Cricket Ground da u Bah Gideon Kharkongor. Haba ai jingkren ha kane ka sngi, na ka liang jong u Nababratta Bhattacharjee (President jong ka MCA), u la kyntu ïa ki player ba ki dei ban ïakhun tyngeh bad ruh ban don ïa ka thong ban ïoh mih madan wat ïa ka ri. Shuh shuh u la ai jingmut ruh ba kum ka kynhun kam dei ban don ïa ka jingsngew syier wat lada kan hap ban aireng pyrshah ïa ki jylla ba kham khlaiñbor ha kane ka lympung.
Ka MCA ka la ïoh ruh ban pynkup burom ïa ki dkhot jong ka Support Staff, kiba kynthup ïa ka Ranjana Yadav (Head Coach), u Marty Mustafa (Asst. Coach), ka Helyna D Sangma ((Trainer), Lucky Mary Marbaniang (Physio TBD-Manager), bad i Badaïahun Mylliemngap (RBDCA-Nongpoh) ki ban sa leit synran ryngkat bad ki player sha katei ka lympung ha Gujarat.
La ïoh ruh ban pynbna ïa ka Ankita Sharma kum ka kapten jong ka kynhun katba ka Dubleen Nengnong kum ka symbud kapten.
Kumban shu pynkynmaw, na ka liang jong ka MCA ka la ïoh ban pynlong ïa ka jingkilanmet ban pynkhreh ïa kane ka lympung , ïa kaba la sdang naduh ka 25 tarik Nailur haduh 3 tarik Risaw ha nongbah Shillong.
Ka kynhun ïalehkai Under-19 kan mih napoh ka jylla ban leit sha Gujarat mynta ka sngi, ka 5 tarik Nailur, 2023.