Shillong, Risaw 04: Ka lympung ïalehkai Volleyball kaba la tip da ka District Level Volleyball Tournament ba la pynïaid East Khasi Hills District Volleyball Association ka la jam sha kaba kut ha ka 30 tarik u Nailur, 2023.
Ha ka thup ïalehkai jong ki kynthei, ïa ka namlahduh la ïohrah da ka St. Anthony’s College, katba ka Gurkha Patshala ka la wan ha ka kyrdan ba ar naba shah rem ha ka final. Baroh ar kynhun ki la ïohpdiang ïa ka khusnam katkum ka kyrdan lem bad ka buskit.
Haba phai sha ka thup ïalehkai jong ki shynrang, ki rangïalehkai jong ka St. Anthony’s College ki la lah ban poi sha ka burom kumba long ki thei hashwa, bad kane ka la wan hadien ba ki la pynliem noh ïa ka KV Happy Valley ha ka final. Kumba la bynta ha ka thup jong ki kynthei, baroh ar kynhun ki la khur ïa ka trophy ryngkat bad ka buskit katkum ka kyrdan (kata ba nyngkong bad ba ar).
Kumban shu pynkynmaw ïa kane ka lympung la sdang ha ka 27 tarik Nailur, 2023 bad la wan ban plie pyrda da u Bah Sanbor Shullai kum u kongsan ryngkat bad u Bah Hamletson Dohling, ha madan Jhalupara Village Council Playground kaba marjan bad ka Rilbong Police Point.
La wan pynhap pyrda noh ïa kane ka lympung da u Bah P.T. Passah-Working President jong ka Meghalaya State Volleyball Association kum u kongsan, u Ayush Murya-CEO Cantonment Board kum u symbud kongsan lem bad kiwei kiba la shah khot sngewbha kiba kynthup ïa u Colonel Thapa, u B.R. Rana-Asst. Inspector General of Police, u Kamal Chetri-Deputy Headman lem bad u Principal jong ka St. Anthony’s bad ruh jong ka Gurka Patshala.
Shuh shuh, ka thong jong ka East Khasi Hills District Volleyball Association da kaba pynlong ïa kane ka lympung ka long ban ïoh jied ïa ki player ha baroh ar thup (shynrang & kynthei) na bynta ka Meghalaya Games ka ban sa long.
